पिंपरी, ता.३१ ः गार्डियन गिरीप्रेमी इन्स्टिट्यूट ऑफ माउंटेनियरिंगच्यावतीने राबविल्या जाणाऱ्या डिप्लोमा इन माऊंटेनियरिंग आणि बेसिक रॉक क्लाइंबिंग कोर्सच्या विद्यार्थ्यांनी एव्हरेस्टवीर कृष्णा ढोकले यांच्या नेतृत्वाखाली ठाणे जिल्ह्यातील दुर्गम माहुली किल्ल्याजवळील ब्रम्हा, विष्णु, महेश, शंकर, पार्वती, वज्र, उंदीर आणि डमरू या आठ सुळक्यांवर तीन दिवसांत यशस्वी चढाई केली.
पायथ्याच्या वांद्रे गावातून तीन गावकऱ्यांच्या मदतीने वाट शोधत ५ तासांचा थकविणारा आणि शेवटच्या टप्प्यात तीव्र चढाई असलेला मोहीम करत चमू माहुली नवरा या सुळक्याच्या पोटातील कृत्रिम गुहेत पोहोचला. बेस कँप सेट करुन थोडी विश्रांती घेतल्यावर डॉ. प्रमोद पाटील यांनी गुहेपासून मुख्य सुळक्यांच्या पायथ्यापर्यंत पोहोचण्यासाठी रोप बांधून मार्ग सुरक्षित केला. सर्वप्रथम विष्णु सुळक्यावर प्रशांत पाटील यांनी चढाई सुरू केली. सुरवातीला चिमणी, नंतर घळ, तिरके आरोहण आणि पुन्हा चिमणी अशा मिश्र स्वरूपाच्या ३५० फूट चढाईनंतर सुळक्याच्या शोल्डरवर पोहोचले. मागोमाग कृष्णा ढोकले यांनी पुढील दगड-माती मिश्रित १०० फूट चढाई करत सुळक्याचा माथा गाठला. पुढे महेश सुळक्यावर सोपी चढाई करून पहिल्या दिवशीचे आरोहण पूर्ण केले.
दुसऱ्या दिवशी जुमरिंग करून सर्व चमू पाहिल्या सुळक्यावर (विष्णु) पोचला. त्यानंतर सचिन शहा, प्रशांत पाटील आणि कृष्णा ढोकले यांनी अनुक्रमे ब्रम्हा, शंकर, पार्वती आणि वज्र या सुळक्यांवर चढाई केली आणि दुसऱ्या दिवशीचे आरोहण पूर्ण केले. त्यानंतर पायथ्याला गुहेत मुक्काम केला.
तिसऱ्या आणि शेवटच्या दिवशी, मालोजी ढोकले या १४ वर्षांच्या बालगिर्यारोहकाने व डॉ. प्रमोद पाटील यांनी अनुक्रमे उंदीर आणि डमरू या १०० आणि ८० फूट उंच सुळक्यांवर आरोहण केले. या मोहिमेत एव्हरेस्टवीर कृष्णा ढोकले, डॉ. प्रमोद पाटील, सचिन शहा, प्रशांत पाटील, सुमल्या सरकार आणि मालोजी ढोकले (वय १४) यांच्यासह अन्य गिर्यारोहकांनी सुळक्यांवर चढाई केली. संतोष निगडे, प्रमोद सावंत यांचे सहकार्य लाभले. तर संपूर्ण मोहीम तेनसिंग नॉर्गे राष्ट्रीय साहस जीवन गौरव आणि शिवछत्रपती क्रीडा पुरस्काराने सन्मानित गिर्यारोहक उमेश झिरपे यांच्या मार्गदर्शनाखाली यशस्वीरीत्या पार पडली.
PNE25V02192