पिंपरी, ता. ५ : पुण्यश्लोक अहिल्यादेवी होळकर (मोरवाडी) चौकात वाहतूक कोंडीचा प्रश्न गंभीर झाला आहे. तो सोडविण्यासाठी मंगळवारी (ता. ४) सकाळी पोलिसांनी रिक्षा चालकांवर दंडात्मक कारवाई केली. त्यानंतर चौक पूर्णपणे मोकळा झाला. मात्र, सायंकाळी रिक्षाचालकांनी चौकात बस्तान बसवले.

मोरवाडी चौकातील वाहतूक कोंडीबाबत ‘सकाळ’ने मंगळवारी ‘चौकात प्रयोग; कोंडीचा उद्योग’ या मथळ्याखाली वृत्त प्रसिद्ध केले होते. त्याची दखल घेत सहाय्यक पोलिस आयुक्त सतीश नांदुरकर यांच्या नेतृत्वाखाली वरिष्ठ पोलिस निरीक्षक वर्षाराणी पाटील यांनी चौकातील रिक्षां चालकांवर कारवाई केली. मात्र, अजूनही महापालिका प्रशासनाला जाग आलेली नसून वाहतूक बेटाचा प्रयोग सुरूच ठेवला आहे. मोरवाडी चौकातून पिंपरीगाव, चिंचवड, नेहरूनगर, लांडेवाडी, भोसरी, मोशी यांसह पुणे आणि मुंबईकडे जाता येते. हा चौक अतिशय वर्दळीचा आहे. पण, गेल्या काही दिवसांपासून चौकात सतत वाहतूक कोंडी होत आहे. चौकाजवळ असलेल्या आस्थापनांमध्ये खरेदीसाठी येणारे नागरिक मेट्रो पुलाखाली, पदपथावर किंवा जागा मिळेल तिथे वाहने उभी करतात. रिक्षा चालकांनीही चौकातील चारही बाजूला स्टॅंड सुरू केला असल्याने वाहतुकीस अडथळा निर्माण होत आहे. त्यात आता महापालिका प्रशासनाने ‘वाहतूक बेट’चा प्रयोग केल्यामुळे रस्ते आणखी अरुंद झाले आहेत. ‘बीआरटी’ मार्गातून जलवाहिनी टाकण्याचे काम सुरू आहे. त्यामुळे तो मार्गदेखील बंद आहे. परिणामी, चौकात वाहनांची कोंडी वाढली आहे. ती सोडविण्यासाठी पोलिसांनी पावले उचलली आहेत. मंगळवारी एकाच दिवसात ७२ रिक्षा चालकांवर कारवाई करत नियमांचे उल्लंघन केल्याप्रकरणी ५७ हजार १०० रुपयांचा दंड ठोठावण्यात आला. तर, २६ हजार ५०० रुपयांचा दंड वसूल केला. पोलिसांनी सकाळी कारवाई केली. मात्र, त्यांची पाठ फिरताच रिक्षाचालकांनी पुन्हा चौकात बस्तान मांडले. सायंकाळी तर रिक्षाचालकांनी अख्खा चौक जाम केला होता. पोलिसांच्या जुजबी कारवाईमुळे वाहतूक कोंडीचा प्रश्‍न मात्र जैसे-थे राहिला आहे.

वाहतूक कोंडी सोडविण्यासाठी मोरवाडी चौकात थांबणाऱ्या रिक्षा चालकांवर दंडात्मक कारवाई सुरू केली आहे. वाहतूक नियोजनासाठी सकाळ आणि सायंकाळी एका पोलिस कर्मचाऱ्याची नियुक्ती केली आहे.
- सतीश नांदुरकर, सहाय्यक पोलिस आयुक्त, वाहतूक विभाग