चऱ्होलीतील खून प्रकरण
पिंपरी, ता. १४ : चऱ्होलीतील येथील खडीमशीन रस्त्यावर व्यावसायिक नितीन गिलबिले यांच्या खूनप्रकरणी पोलिसांनी मुख्य आरोपीसह तिघांना अटक केली. पोलिसांनी मोटारीचा पाठलाग करून दोन जणांना ताब्यात घेतले.
अमित जीवन पठारे (वय ३५, रा. पठारेमळा, चऱ्होली), विक्रांत सुरेश ठाकूर (रा. सोळू, ता. खेड), सुमीत फुलचंद पटेल (वय ३१, रा. गायकवाडनगर, दिघी) अशी आरोपींची नावे आहेत. गिलबिले यांच्या डोक्यात गोळी झाडून आरोपी फरार झाले होते. बुधवारी (ता. १२) सायंकाळी गिलबिले आणि इतर काही जण खडीमशीन रस्त्यावर थांबले होते. त्यावेळी त्यांचे मित्र पठारे आणि ठाकूर हे दोघे मोटारीतून तेथे आले. त्यांनी गिलबिले यांना मोटारीत बसवले आणि त्यांच्या डोक्यात गोळी झाडली. यात गिलबिले यांचा मृत्यू झाला. त्यानंतर आरोपी घटनास्थळावरून पसार झाले होते.
या प्रकरणातील आरोपी ताम्हिणी घाट परिसरात असल्याची माहिती पिंपरी चिंचवड पोलिसांच्या खंडणी विरोधी पथकाला मिळाली. त्यानुसार पोलिस त्या परिसरात शोध घेत होते. पोलिसांना नंबर प्लेट नसलेली एक मोटार ताम्हिणी घाटाकडून पौडकडे जाताना दिसली. ही मोटार दिसताच पोलिसांनी पाठलाग सुरू केला. मोटारीतील ठाकूर व पटेल यांना पोलिसांनी ताब्यात घेतले. पोलिसांनी मोटार व मोबाईल जप्त केले.
मुख्य आरोपी पठारे याला दिघी पोलिसांनी वाघोलीतून ताब्यात घेतले. पटेल हा वेळी गोळीबारापूर्वी व नंतरही दोन दिवस आरोपींबरोबरच होता. त्यामुळे त्यालाही ताब्यात घेण्यात आले. हा खून जमिनीच्या वादातून झाल्याचा प्राथमिक अंदाज व्यक्त केला जात आहे.
-------------