सोमाटणे, ता. १७ : द्रुतगती मार्गाने शेताकडे जाताना हजारो रुपयांच्या दंडाचा भुर्दंड बसला आहे. तो माफ करून स्थानिक वाहनचालकांना महामार्गावर विनामूल्य प्रवेश द्यावा, अशी मागणी करण्यात आली आहे. सध्या अनेक स्थानिक वाहन चालकांवर पन्नास हजारांपेक्षा अधिक रकमेचा दंड पडलेला आहे, अशी माहिती नागरिकांनी दिली आहे.
अपघात टाळण्यासाठी रस्ते विकास महामंडळाने संपूर्ण ९४ किलोमीटर अंतराच्या किवळे ते कळंबोली मार्गावर सीसीटीव्ही बसविल्याने नियम मोडणाऱ्या चालकांना दंडात्मक कारवाईला सामोरे जावे लागते. याचा सर्वाधिक फटका स्थानिकांना बसत असून सेवा रस्ता नसल्याने शेतात किंवा इतर कामासाठी द्रुतगती मार्गाने दुसऱ्या गावाला जावे लागते. द्रुतगती मार्गावर नो एंट्रीतून प्रवेश करताच स्थानिकांना दंडाचा फटका बसतो. किमान दीड हजारांपेक्षा अधिक दंडाचे परिवहन विभागाकडून चलन येते. दंड भरला नाही, तर न्यायालयाची पायरी चढण्याची वेळ येऊ शकते.
सेवा रस्ता नसल्याने स्थानिक शेतकऱ्यांना चार ते पाच किलोमीटर अंतराच्या प्रवासासाठी हा दंडाचा भुर्दंड बसत आहे. हे थांबवण्यासाठी तातडीने किवळे ते कुसगावदरम्यान बाहेर व आत प्रवेश करण्याच्या ठिकाणांवरील सीसीटीव्ही हटवावेत. भूमिपुत्रांना द्रुतगती मार्गावर जाण्या-येण्यासाठी प्रवेश खुला करावा. वाहनांवरील दंड रद्द करावा अन्यथा तीव्र आंदोलन करू, असा इशारा निवेदनाद्वारे जमीन हक्क परिषदेचे अध्यक्ष माउली सोनवणे, शेतकरी कृती समितीचे अध्यक्ष सुभाष धामणकर, भारतीय किसान संघाचे अध्यक्ष विश्वनाथ शेलार, कृष्णा कारके, दिनकर शेटे आदींनी दिली.