चिखली, ता. १८ : वीरशैव समाजात जैनांची अहिंसा, बौद्धांची समता, ख्रिस्तांची करुणा, द्रविडांची भक्ती, निष्ठा, ज्ञान, भक्ती असे गुणधर्म सामावलेले आहेत. वीरशैव समाजाची महानता सांगताना इतर धर्माचे देखील पावित्र्य आमच्याकडून जपले जाते,’’ असे उद्‍गार माजी खासदार डॉ. जयसिद्धेश्वर शिवाचार्य महास्वामी यांनी काढले.
हिंदू वीरशैव लिंगायत मंचाच्यावतीने, चिखली येथे आयोजित तिसऱ्या वीरशैव समाज महामेळाव्यात ते बोलत होते. डॉ. अभिनव चन्नमलेश्वर शिवाचार्य महास्वामी, पुण्यश्लोक अहिल्यादेवी सोलापूर विद्यापीठाचे माजी कुलगुरू डॉ. इरेश स्वामी, एटीएसएस महाविद्यालयाचे प्राचार्य डॉ. विश्वास स्वामी, अभिषेक विद्यालयाचे अध्यक्ष
गुरुराज चरंतीमठ, पंचांप्पा मेनसे, सामाजिक कार्यकर्ते विकास साने, हिंदू वीरशैव लिंगायत मंचाचे अध्यक्ष आयोजक सतीश पाटील, गणेश पाटील, आकाश पाटील, मंगेश पाटील आदी मान्यवर उपस्थित होते.
डॉ. महास्वामी म्हणाले, ‘‘हाताची पाच बोटे ही सारखी नसली तरी ते जेवणाचा घास घेताना ती एकत्रित येऊन मुखात जातात. त्या बोटांप्रमाणे वीरशैव समाजात विविध जाती आहे. पण, सामाजिक कार्यात वीरशैव समाजाने मतभेद बाजूला ठेवून एकत्र आले पाहिजे.’’
डॉ. अभिनव महास्वामी यांनी संगत सज्जनासोबत केली; तर फळ चांगले मिळेल. जीवनात अध्यात्म किती महत्वाचे आहे ? या विषयावर कन्नड भाषेत मार्गदर्शन केले. राजू जाधव यांनी सूत्रसंचालन केले; तर सुनील शेवाळे यांनी आभार मानले. चंद्रशेखर पाटील, इरान्ना पाटील, सुरेश पाटील, राजू पाटील यांनी कार्यक्रमाच्या आयोजनात विशेष परिश्रम घेतले.
PNE25U91004