पिंपरी, ता. २५ ः ‘गोपाला गोपाला, देवकीनंदन गोपाला’ यासारख्या असंख्य भजन, कीर्तनाच्या माध्यमातून अज्ञान, अस्वच्छता आणि अंधश्रद्धा निर्मूलनासाठी अखंड परीश्रम घेणारे मानवतावादी संत गाडगेबाबा हे थोर समाजसुधारक होते, असे प्रतिपादन महापालिका अतिरिक्त आयुक्त चंद्रकांत इंदलकर यांनी केले. संत गाडगेबाबा जयंतीनिमित्त त्यांच्या प्रतिमेस पुष्पहार अर्पण करून महापालिकेतर्फे अभिवादन करताना ते बोलत होते. उपआयुक्त अण्णा बोदडे, विधीतज्ञ विनोद पाटील, जनता संपर्क अधिकारी प्रफुल्ल पुराणिक, सामाजिक कार्यकर्ते नरेश कदम, विशाल जाधव, निखील दळवी, अमोल पुन्हासे, सुनिल अभंग, श्रीरंग काळभोर, गणेश मांगडे, व्ही. एस. राऊत आदी उपस्थित होते. संत गाडगेबाबांनी अनाथ लोकांसाठी ठिकठिकाणी धर्मशाळा, अनाथालये, विद्यालये सुरू केली. त्यांच्या नावाने शासन स्तरावर संत गाडगेबाबा स्वच्छता अभियान देखील सुरू आहे, असेही इंदलकर यांनी सांगितले.