सोमाटणे, ता. १६ ः पवन मावळात पडत असलेल्या जोरदार पावसाने आढले, पुसाणे, कासारसाई धरणाच्या पाणी पातळीत मोठी वाढ झाली असून, साळुंब्रे पूल पाण्याखाली गेला आहे.
पवन मावळात आज पाचव्या दिवशीही संततधार पाऊस सुरु असून, आज मध्यरात्री पावसाचा जोर आणखी वाढला. या पावसाने पवना, कासारसाई, आढले नद्यांना पूर आला आहे. या पुरामुळे रविवारी मध्यरात्रीपासून साळुंब्रे पूल पाण्याखाली गेला. सध्या पुलावरून पाणी वाहत असल्याने साळुंबे, गहुंजे मार्ग वाहतुकीसाठी बंद झाला. आढले नदीला आलेल्या पुरामुळे आढले धरणाच्या पाणी पातळीत मोठी वाढ झाली. कासारसाई नदीला आलेल्या पुरामुळे पुसाणे धरण पूर्ण क्षमतेने भरले असून, धरणाच्या सांडव्यातून पाणी वाहत आहे. पुसाणे धरणातून वाहत असलेल्या जोरदार पाण्यामुळे कासारसाई धरणाच्या पाणीपातळीत तीन टक्क्यांनी वाढ झाली. सध्या धरणात
उपयुक्त पाणीसाठा ६. २२ दशलक्ष घनमीटर तर एकूण पाणीसाठा ७. ५४ दशलक्ष घनमीटर झाला आहे. धरण ३९ टक्के भरले, अशी माहिती शाखा अभियंता अमर धायगुडे यांनी दिली.
---------------------------------------------------------------------------------------