पिंपरी, ता. १६ ः पिंपरी चिंचवड शहरातील राष्ट्रवादी कॉंग्रेस शरदचंद्र पवार पक्षाचे पदाधिकारी व कार्यकर्ते यांच्याशी संवाद साधण्यासाठी शरद पवार उद्या (मंगळवारी) पिंपरी चिंचवडमध्ये बैठक घेणार आहेत. महापालिका निवडणुकांच्या अनुषंगाने विविध महत्त्वपूर्ण मुद्द्यांचा या बैठकीत आढावा घेतला जाणार आहे. ताथवडेतील सिल्वर बॅंक्वेट हॉल येथे सकाळी अकराला होणाऱ्या बैठकीला पक्षाचे प्रदेशाध्यक्ष जयंत पाटील, खासदार अमोल कोल्हे उपस्थित राहणार आहेत.
विधानसभा निवडणुकांनंतर पहिल्यांदाच पक्षाचे राष्ट्रीय अध्यक्ष, खासदार शरद पवार पिंपरी चिंचवड शहरात येत आहेत. त्यामुळे येणाऱ्या महापालिका निवडणुकीच्या पार्श्‍वभूमीवर पक्षामध्ये होणारे बदल, दिल्या जाणाऱ्या जबाबदाऱ्या या विषयी या बैठकीत महत्त्वपूर्ण निर्णय होण्याची शक्यता वर्तविण्यात येत आहे. त्यामुळे राष्ट्रवादी कॉंग्रेस शरदचंद्र पवार पक्षाचे पदाधिकारी, कार्यकर्ते यांच्यासह शहरातील इतर पक्षांचेही लक्ष या बैठकीकडे लागले आहे. विधानसभा निवडणुकीत आलेल्या अपयशानंतर पक्षातील कार्यकर्ते व पदाधिकारी यांचे मनोबल उंचावण्यासाठी ही बैठक महत्त्वपूर्ण असल्याने या बैठकी विषयीची उत्सुकता राजकीय वर्तुळामध्येही दिसून येत आहे.
-------------------------------------------------