प्रदीप लोखंडे : सकाळ वृत्तसेवा
पिंपरी, ता. १७ : पुणे महानगर प्रदेश विकास प्राधिकरणांतर्गत (पीएमआरडीए) असलेल्या मावळ, लोणावळा आणि इतर पर्यटनस्थळी दरवर्षी पावसाळ्यात पर्यटकांची गर्दी होते. यामुळे नैसर्गिक आपत्ती, पावसामुळे अचानक येणारे पूर, भूस्खलन, अपघात अशा संकटांना सामोरे जावे लागते. यावर्षीही पावसाळ्याच्या तोंडावर कुंडमळा (ता. मावळ) येथे साकव कोसळल्याच्या दुर्घटनेनंतर पर्यटकांच्या सुरक्षेबाबत चिंता व्यक्त केली जात आहे. या पार्श्वभूमीवर ‘पीएमआरडीए’चा अग्निशमन विभाग आणि पीडीआरएफ (पुणे महानगर आपत्ती प्रतिसाद पथक) पथक तैनात करण्यात आले आहे. त्‍यासाठी ९० कर्मचारी कार्यरत आहेत.

अग्निशमन दल आणि ‘पीडीआरएफ’चे प्रशिक्षित कर्मचारी मावळ, लोणावळा, भोर, वेल्हा, पिरंगुटसारख्या अतिवृष्टीप्रवण भागांमध्ये गरजेनुसार तत्पर असतील. विशेष प्रशिक्षण घेतलेले हे जवान पूर, दरड कोसळणे, नदीपात्रात अडकलेले पर्यटक, अपघात अशा स्थितीत मदतीसाठी तातडीने पोचतील. यासाठी जीवनरक्षक साहित्य, बोट, लाइफ जॅकेट, दोर व आवश्यक यंत्रसामग्री पुरविण्यात आली आहे. कुंडमळा दुर्घटनेनंतर प्रशासन अधिक सतर्क झाले असून, अशा घटनांची पुनरावृत्ती टाळण्यासाठी धोरणात्मक निर्णय घेण्यात येत आहेत. आपत्तीच्या प्रसंगी वेळीच मदत पोचवण्याचा पथकांचा मुख्य उद्देश आहे.

आपत्कालीन परिस्थितीत बचाव कार्यासाठी अत्याधुनिक उपकरणांचा पथकात समावेश आहे. हायड्रोलिक जॅक, हायड्रोलिक कटर, स्प्रेडर, मेटल कटर, काँक्रीट कटर, रेस्क्यू रॉकेट लॉन्चर, इन्फोटेबल लाइट, व्हेइकल माउंटेड लाइट आदी उपकरणे आहे. नदी अथवा पुरामध्ये नागरिक अडकल्यास पाण्याच्या प्रवाहामुळे पोचणे कठीण असल्यास या उपकरणाची मदत घेता येणार आहे.

या सुविधांनी सज्‍ज
‘पीएमआरडीए’ हद्दीत पूरजन्य परिस्थिती निर्माण झाल्यास त्यांच्या बचावासाठी पेट्रोल इंजिनच्या चार रबरी बोटची सुविधा आहे. त्याचबरोबर बचाव कार्यासाठी आवश्यक उपकरणे ने-आण करण्यासाठी एक टेम्पो, मालवाहू गाडी, कर्मचारी ने-आण करण्यासाठी ३२ आसनी बस तैनात आहे.

या ठिकाणी कर्मचारी तैनात
अग्निशमन दल व पुणे महानगर पुणे महानगर आपत्ती प्रतिसाद पथकचे एकूण ९० मनुष्यबळ आहे. प्रती अग्निशमन केंद्रावर ३० मनुष्यबळ कार्यरत आहे. हे मनुष्यबळ नांदेड सिटी अग्निशमन केंद्र, वाघोली अग्निशमन केंद्र, मारुंजी अग्निशमन केंद्र येथे कार्यरत आहे.

पावसाळ्यातील आपत्ती काळात नागरिकांच्‍या सुरक्षिततेसाठी ‘पीएमआरडीए’ प्रशासन सज्‍ज आहे. अग्निशमन आणि ‘पीडीआरएफ’ पथकाचे जवानही तैनात आहेत. काही परिस्थिती निर्माण झाल्यास त्‍वरीत कार्यवाहीसाठी यंत्रणा तत्‍पर आहे.
- डॉ. योगेश म्‍हसे, आयुक्‍त, पीएमआरडीए.