‘मराठी संमेलनात लोककलेला
व्यासपीठ मिळवून द्यावे’

पिंपरी, ता. ७ ः अखिल भारतीय मराठी साहित्य संमेलनात लोककलेला (पोवाडा, भारुड, लावणी, गौळण,) व्यासपीठ मिळवून द्यावी, अशी मागणी कवयित्री सुनंदा शिंगनाथ यांनी मुख्यमंत्री देवेंद्र फडणवीस यांच्याकडे केली आहे.
अनेक वर्षांपासून अखिल भारतीय मराठी साहित्य संमेलनात मराठीचा गौरव करण्याच्या हेतूने मराठी साहित्य महोत्सव प्रचंड मोठ्या प्रमाणात आयोजित केला जातो. यामध्ये विविध साहित्य प्रकारांना मानाचे स्थान दिले जाते. शिवाय विविध विषयावर परिसंवाद, कथाकथन, कवी संमेलन , कवीकट्टाचेही आयोजन केले जाते. यामध्ये महाराष्ट्राच्या कानाकोपऱ्यातून अनेक कवी कवयित्रींनी अखिल भारतीय मराठी साहित्य संमेलनात कविता सादर करण्याची संधी उपलब्ध करून दिलेली आहे. लोककला मात्र अखिल भारतीय मराठी साहित्य संमेलनापासून वंचित आहे. जी लोककला महाराष्ट्राच्या साहित्यिक वैभवात अनेक शतकांपासून मोलाची भर घालत आहे, अशी लोककला ज्यामध्ये पोवाडे, भारुडे आहेत, महाराष्ट्राची शान असणारी आणि आपले वेगळेपण जपणारी लावणी आहे, गवळणी आहेत, तसेच लोककलेच्या अंगाने येणारी विविध साहित्य प्रकार असतात. परंतु याकडे दुर्लक्ष होताना दिसत आहे. लोककलेची सन्मान आणि जपवणूक व्हावी आणि पोवाडे भारुडे लागले गवळण इत्यादी साहित्याची मोठ्या प्रमाणात निर्मिती होण्यासाठी अखिल भारतीय मराठी साहित्य संमेलनात लोकप्रिय व्यासपीठ मिळणे आवश्यक आहे.