पिंपरी, ता. १३ : महापालिका शिक्षण विभागाने इंग्रजी माध्यमाच्या सहा अनधिकत शाळांची यादी प्रसिद्ध केली. त्याला दोन महिने उलटले. पण, आतापर्यंत एकाही शाळेवर कारवाई करण्यात आलेली नाही. गेल्या वर्षी अनधिकृत ठरवलेल्या १३ पैकी सात शाळांची नावे यावर्षी गायब करण्यात आली आहेत. त्यामुळे प्रशासन अधिकाऱ्यांचे आदेश कागदावरच आहेत. विशेष म्हणजे ‘अनधिकृत शाळा’ असे फ्लेक्स मोजक्याच शाळांसमोर लावल्याचे दिसून आले आहे.
शासन नियमानुसार शाळा चालविण्यासाठी मान्यता घेणे आवश्‍यक असते. त्या शिवाय सुरू असलेल्या शाळांना ‘अनधिकृत’ ठरवले जाते. सध्या शहरात २० पेक्षा अधिक अनधिकृत प्राथमिक शाळा मागील दहा वर्षांपासून सुरू आहेत. या शाळांना शिक्षण विभागाने नोटीसही बजावल्या आहेत. पण, त्यापुढे कोणतीही ठोस कारवाई झालेली नाही. शिक्षण हक्क कायद्यानुसार (आरटीई) महापालिका स्तरावर कारवाईचे अधिकार आहेत. पण, या शाळांना अभय दिले जात आहे.
अनधिकृत शाळांच्या मान्यतेचे प्रस्ताव शासनदरबारी पडून आहेत. या शाळांना शिक्षण हक्क अधिनियमानुसार त्वरित सरकारी मान्यता मिळवणे, किंवा शाळा बंद करणे यापैकी एकाची निवड करणे आवश्‍यक आहे. पण, तसे झालेले नाही. या शाळांनी ३१ मार्चपूर्वी कामकाज बंद करणे अपेक्षित होते. पण, शिक्षण विभागाने अनधिकृत शाळांची यादी उशिरा जाहीर केल्यामुळे अनधिकृत शाळा लपविण्याचा डाव तर नाही ना, अशी शंका शिक्षण क्षेत्रातून उपस्थित केली जात आहे.

विषय तज्‍ज्ञ आणि पर्यवेक्षकाकडून बनवाबनवी
शिक्षण विभागातील विषयतज्‍ज्ञ आणि पर्यवेक्षकांनी जूनपर्यंत सर्वेक्षण केले. त्यानंतर गेल्या वर्षीच्या यादीतील सात अनधिकृत शाळांची नावे गायब करण्यात आली. तर, सहा शाळा अनधिकृत असल्याचा निष्कर्ष त्यांनी काढला. त्यामुळे विषयतज्‍ज्ञ आणि पर्यवेक्षकांच्या शाळा पडताळणीबाबत प्रश्‍नचिन्ह निर्माण होत आहे. दरम्यान, अनधिकृतपैकी किती शाळांना मान्‍यता मिळाली आणि किती शाळा बंद केल्या, याची माहिती शिक्षण विभागाकडे उपलब्ध नाहीत.

पर्यवेक्षकांकडून शाळांची माहिती मागवून पडताळणी केली आहे. अनधिकृत शाळा सापडल्यास त्यांना नोटीस पाठवून शाळा बंद ठेवण्यात येणार आहे. तर, प्रशासनाने अनेक शाळांवर कारवाई केली आहे.
- संगीता बांगर, प्रशासन अधिकारी

- यावर्षीच्या अनधिकृत शाळा
ज्ञानराज विद्या प्राथमिक शाळा, कासारवाडी
स्टारडम इंग्लिश स्कूल, चऱ्होली
लिटील स्टार इंग्लिश मीडियम स्कूल, चिंचवडेनगर
ओरॅकल इंग्लिश मीडियम स्कूल, चऱ्होली
प्रीती इंग्लिश मीडियम स्कूल, चक्रपाणी वसाहत भोसरी
द होली मिशन इंग्लिश मीडियम स्कूल, नवी सांगवी

गेल्या वर्षी जाहीर केलेल्या अनधिकृत शाळा
पिपल ट्री एज्युकेशन ट्रस्ट, पिंपळे निलख
चैतन्य इंग्लिश मीडियम स्कूल, विशालनगर
आयडीएल इंग्लिश स्कूल, पिंपळे गुरव
स्टारडम इंग्लिश मीडियम स्‍कूल, चऱ्होली
लिटील स्टार इंग्लिश मीडियम स्कूल, चिंचवडेनगर
नवजित विद्यालय, लक्ष्मीनगर-वाल्हेकरवाडी
किड्सजी स्‍कूल, पिंपळे सौदागर
एम.एस. स्‍कूल फॉर किड्स, सांगवी
क्रिस्टल मॉर्डन स्‍कूल, चिंचवड
ऑर्किड इंटरनॅशनल स्‍कूल, चिंचवड
माउंट एव्हरेस्ट इंग्लिश स्‍कूल, कासारवाडी
डी. एम. के. इंग्लिश स्‍कूल, कासारवाडी