सोमाटणे, ता. १३ ः श्रावण महिन्याचा शेवट असल्याने घोरावडेश्वर व वाघेश्वर मंदिरात भाविकांची दर्शनासाठी गर्दी होत आहे. अशावेळी कचरा मुक्त देवस्थाने ठेवा अशी हाक आढले येथील शालेय विद्यार्थ्यांनी दिली.
घोरावडेश्वर मंदिरात देवस्थान समितीच्या वतीने तर वाघेश्वर मंदिरात आढले ग्रामस्थांच्या वतीने श्रावण महिन्याच्या सुरवातीपासून पहाटे धार्मिक कार्यक्रम करण्यात आले. सोमवार नसतानाही सकाळी सहा वाजण्याच्या सुमारास भाविकांनी दर्शनासाठी गर्दी केली होती, दुपारी गर्दी आणखी वाढली. वाघेश्वर डोंगरावर अनेकांनी खाद्यपदार्थ व फराळ केल्यानंतरचे टाकाऊ पदार्थ दर्शन मार्गावर टाकले होते. ही बाब लक्षात येताच दर्शनासाठी आलेल्या शालेय विद्यार्थ्यांनी मंदिर परिसरासह दर्शन मार्गावर साफसफाई केली. गोळा केलेले कागद व अन्य घटक पिशव्यांत साठवून त्यांची योग्य ठिकाणी विल्हेवाट लावून प्रदूषण रोखण्यास मदत केली. भाविकांनी कचरा, टाकाऊ अन्नपदार्थ, इतरत्र न फेकता कचराकुंडीत टाकावा असे आवाहन विद्यार्थ्यांनी केले.