पिंपरी, ता. १८ : आकुर्डी प्राधिकरणातील ग. दि. माडगूळकर नाट्यगृहात संगीतमय वातावरणात मंगलसुरांच्या अभ्यंगस्नानाने रसिकांची दिवाळी पहाट उजळून निघाली.
पिंपरी चिंचवड महापालिकेच्या भारतरत्न पंडित भीमसेन जोशी संगीत अकादमीतर्फे आयोजित दिवाळी पहाट - दीपबंध सुरांचा हा विशेष सांस्कृतिक कार्यक्रम उत्साहात झाला.
सुर निरागस हो... या भावगीताने कार्यक्रमाची सुरवात झाली. गायक कोमल कृष्णा, राजेश्वरी पवार, विनल देशमुख, गणेश मोरे यांनी शोधीसी मानवा, सूर तेच छेडीता, अधीर मन झाले, बहरला हा मधुमास नवा, पिया तो से नयना लागे रे, ये हसी वादिया, ''मेरे ढोलना सुन''... अशी विविध मराठी आणि हिंदी गीते सादर करून रसिकांची मने जिंकली. कानडा राजा पंढरीचा... या अभंगातून भक्तिरसाची पेरणी झाली. माऊली माऊली रूप तुझे... या गाण्याच्या सुरांनी संगीतमय तोरण चढवले.
वादक कलाकारांनीही आपली प्रतिभा खुलवली. नितीन खंडागळे, सुबोध जैन, दीपक काळे, शाम चंदनशिवे आणि सागर घोडके यांच्या वादनकौशल्याने कार्यक्रमाला अप्रतिम रंग चढवला. कार्यक्रमाचे निवेदन रत्ना दहीवेलकर यांनी ओघवत्या शैलीत केले.
---
कोमल चौधरी यांचा सन्मान
हरियाना येथे नुकत्याच झालेल्या मिस डिवाइन ब्युटी २०२५ या स्पर्धेत मिस अर्थ इंडिया २०२५ हा पुरस्कार कोमल चौधरी यांना मिळाला. त्या आता जागतिक स्तरावर होणाऱ्या मिस अर्थ स्पर्धेत भारताचे प्रतिनिधित्व करणार आहेत. त्याबद्दल महापालिकेतर्फे कोमल चौधरी यांचा सन्मान करण्यात आला.
--------