पिंपरी, ता. २१ : नवी सांगवी येथील जिल्हा सर्वोपचार रुग्णालयात नवजात अर्भकांच्या उपचारासाठी अत्यावश्यक असलेला एसएनसीयू (नवजात बालकांचा अतिदक्षता विभाग) विभाग सध्या अर्धवट स्थितीत आहे. नवजात बालकांसाठी आवश्‍यक असलेल्‍या इनक्युबेटर (काचेच्‍या पेटी) युनिट्ससाठी अपुरी जागा आहे. २४ ची मंजुरी असताना केवळ १२ इनक्युबेटर बसविले आहेत. परिणामी अतिजोखमीच्या अवस्थेतील नवजात बाळांना वेळेवर उपचार मिळण्याची अडचण येत आहे. खासगी रुग्णालयाचा आधार घेण्याची वेळ रुग्णांच्‍या नातेवाइकांना येत आहे.
जिल्‍हा रुग्णालयातील नवजात शिशू विभागात वर्षाकाठी सुमारे एक हजार ३०० मुले उपचारासाठी दाखल होतात. कमी वजनाच्या नवजात बाळाला सुरक्षित ठेवण्यासाठी इनक्युबेटर वापरले जाते. पूर्वी या विभागात १२ इनक्युबेटर मंजूर होते. रुग्णालयाकडून दिलेल्‍या सुविधेमुळे २४ इन्‍क्‍युबेटरला मंजुरी मिळाली. एवढे इनक्युबेटर बसविण्यास जागा उपलब्ध नव्‍हती. तरीही कमी जागेत ही यंत्रणा बसविण्यात आली होती. मात्र दरम्‍यानच्‍या काळात १७ नोव्‍हेंबर २०२४ मध्ये या विभागात आगीची घटना घडली होती. त्‍यानंतर काही इन्‍क्‍युबेटरचे युनिटस इतर ठिकाणी हलविण्यात आले. सध्या केवळ १२ इनक्युबेटर उपलब्ध आहेत.

रुग्णसेवेच्या गरजांकडे दुर्लक्ष करून प्रशासनाने चार कोटी रुपयांचा निधी पेव्हर ब्लॉक बसवणे, रंगरंगोटी, फर्निचर बदल व इतर सौंदर्यीकरण कामांवर खर्च केला आहे, असा आरोप सामाजिक संघटना करत आहेत. इनक्युबेटर कमी असल्‍याने अनेकांना आपल्‍या बालकांवर उपचार करण्यासाठी खासगी रुग्णालयाचा आधार घ्यावा लागत आहे. त्‍यासाठी दिवसाकाठी पाच ते दहा हजार रुपये मोजावे लागत आहे. त्‍यामुळे जागेची उपलब्धता करण्याबरोबर २४ इन्‍क्‍युबेटरची सुविधा देण्याची मागणी होत आहे. तर सध्या आर्गीच्‍या दुर्घटनेनंतर या विभागाचे दुरुस्तीचे काम सुरू असल्‍याने २४ युनिट्स बसविले नसल्‍याची माहिती विभागाने दिली.

इन्क्यूबेटर का वापरला जातो? -
- कमी वजनाने जन्मलेले बाळ.
- मुदतपूर्व जन्‍मलेले बाळ.
- श्वासोच्छवासात अडचण येत असलेले बाळ.
- शरीराचे तापमान राखू न शकणारे बाळ.
- संसर्गापासून संरक्षण आवश्यक असलेले बाळ.

प्रतिक्रिया :
‘‘नवजात बाळांच्या जीवाशी खेळ करणाऱ्या अधिकाऱ्यांची तत्काळ चौकशी होणे गरजेचे आहे. शासनाने याची गंभीर दखल घेऊन योग्य ती कार्यवाही तातडीने करावी. रुग्णसेवेच्या गरजांकडे दुर्लक्ष केले जात आहे. प्रशासनाने चार कोटी रुपयांचा निधी नको त्‍या कामावर खर्च केला आहे.
- शरत शेट्टी, स्‍थानिक नागरिक.

‘‘आगीच्‍या दुर्घटनेमुळे नवजात बालकांच्‍या विभागातील काही यंत्रणा इतरत्र हलविल्‍या आहेत. सध्या या विभागाचे देखभाल दुरुस्तीचे कामकाज सुरू आहे. त्‍यामुळे जेवढी सध्या उपलब्धता आहे, त्‍यानुसार १२ इनक्युबेटर चालू ठेवले आहेत. विभागाचे कामकाज झाल्‍यानंतर सर्वच २४ युनिट्स लावण्यात येतील.
- सुरेखा चावरिया, बालरोग तज्ज्ञ.