पिंपरी, ता. २४ : कुष्ठरोगाचे लवकर निदान झाले तर उपचार परिणामकारक ठरतात. हे लक्षात घेता पिंपरी चिंचवड महापालिकेच्या वैद्यकीय विभागातर्फे ‘कुष्ठरोग शोध अभियान’ राबविण्यात येत आहे. यात शहरात आतापर्यंत ३७ हजार ६४५ घरांची तपासणी करण्यात आली. त्यापैकी १८७ संशयित आढळले आहेत. यातील ९१ जणांच्या तपासण्या पूर्ण झालेल्या असून यापैकी चौघांना कुष्ठरोग निष्पन्न झाला आहे.

केंद्र शासनाच्या सूचनेनुसार यंदाही १७ नोव्हेंबर ते दोन डिसेंबरपर्यंत राज्यभर कुष्ठरोग शोध अभियान राबविण्यात येत आहे. लवकर निदान, योग्य उपचार आणि समाजातील भीती दूर करणे हा या मोहिमेचा उद्देश आहे. महापालिकेच्या वैद्यकीय पथकांत आशा स्वयंसेविका आणि प्रशिक्षित स्वयंसेवक सलग चौदा दिवस हे सर्वेक्षण करणार आहेत. यात गृहभेटी देऊन त्वचेवरील चट्टे, सुन्नपणा, नसांमध्ये सूज आणि संवेदना कमी होणे यांसारख्या संभाव्य लक्षणांची प्रत्यक्ष तपासणी केली जात आहे. संशयास्पद रुग्णांची तातडीने तपासणी करून उपचारासाठी पाठविण्यात येत आहे.

कुष्ठरोगाचे लवकर निदान होऊन रुग्णांवर तत्काळ उपचार केले जावेत यासाठी राज्य सरकारने राबविलेल्या या मोहिमेत महापालिकाही सहभागी झालेली आहे. घरी आलेल्या वैद्यकीय विभाग कर्मचारी तसेच आशा स्वयंसेविका यांना नागरिकांनी सहकार्य करावे.
- डॉ. लक्ष्मण गोफणे, आरोग्य वैद्यकीय अधिकारी, महापालिका