पिंपरी, ता. २५ ः यशवंतराव चव्हाण प्रतिष्ठानच्या पिंपरी चिंचवड विभागातर्फे देण्यात येणारा ‘यशवंत-वेणू सन्मान’ लातूरचे माजी आमदार शिवाजीराव पाटील कव्हेकर आणि त्यांच्या पत्नी प्रतिभा या दाम्पत्याला प्रदान करण्यात येणार आहे. चिंचवडमधील ऑटोक्लस्टर सभागृहात गुरुवारी (ता.२७) या सोहळ्याचे आयोजन करण्यात आले आहे. साहित्यिक डॉ. श्रीपाल सबनीस यांच्या हस्ते पुरस्कार देण्यात येईल. डॉ. पंडित विद्यासागर, ज्येष्ठ सामाजिक कार्यकर्ते गिरीश प्रभुणे, अखिल भारतीय मराठी साहित्य महामंडळाच्या कार्यवाह सुनीताराजे पवार यावेळी उपस्थिती असतील. याच कार्यक्रमात विशाल पलांडे (यशवंतराव चव्हाण युवा उद्योजक पुरस्कार), ज्येष्ठ साहित्यिक नंदकुमार मुरडे (यशवंतराव चव्हाण सह्याद्री भला माणूस पुरस्कार) यांना सन्मानित करण्यात येईल. याप्रसंगी श्रमश्री बाजीराव सातपुते यांचे ''यशवंतराव इतिहासाचं एक सोनेरी पान'' या विषयावर व्याख्यान होईल. या सोहळ्याचा सर्व नागरिकांनी आवर्जून उपस्थित राहावे, असे आवाहन विभागाचे अध्यक्ष पुरुषोत्तम सदाफुले यांनी केले आहे.
-----