पिंपरी, ता. २७ ः भारतीय संविधानाच्या ७६ व्या वर्धापन दिनाचे औचित्य साधून, अखिल भारतीय विद्यार्थी परिषद, पिंपरी चिंचवड महानगरने शहरात ७६ ठिकाणी ‘संविधान उद्देशिके’चे सामूहिक पठण केले. संविधानिक मूल्ये हीच राष्ट्रनिष्ठा, अशी भावना विद्यार्थ्यांमध्ये रुजली.
या उपक्रमात शहरातील शाळा, महाविद्यालये, तांत्रिक शिक्षण संस्था येथील विद्यार्थी, शिक्षक व नागरिकांनी उद्देशिकेचे पठण केले. अभाविपच्या कार्यकर्त्यांनी उद्देशिका पठणापूर्वी विद्यार्थ्यांना संविधानाचे महत्त्व आणि सामान्य नागरिकाचे अधिकार व कर्तव्ये याबद्दल मार्गदर्शन केले.
यावेळी अभाविप पिंपरी चिंचवड महानगर मंत्री हिमांशू नागरे म्हणाले, ‘‘संविधानाची उद्देशिका हा आपल्या देशाचा आत्मा आहे. विद्यार्थिदशेतच या मूल्यांची जाणीव होणे आवश्यक आहे.’’ हा उपक्रम देश आणि समाजाप्रती निष्ठा ठेवण्यासाठी विद्यार्थ्यांना प्रेरणा देणारा ठरला.