पिंपरी, ता. ५ : बेल्जियममधील ल्यूव्हेन शहरातील ‘इंडिया हाऊस’चे संचालक गीर्ट रोबरेख्त्स यांनी नुकताच पिंपरी चिंचवडचा दौरा केला. राहण्यायोग्य शहरांसाठी आंतरराष्ट्रीय सहकार्य करण्याच्या दृष्टिने त्यांनी महापालिकेला भेट देऊन विविध विभागांतील अधिकाऱ्यांशी त्यांनी चर्चा केली.
तीन आणि चार डिसेंबर असा त्यांचा दोन दिवसांचा दौरा होता. शाश्वत विकास, नवोपक्रम, उद्योग क्षेत्र आणि शहरी गतिशीलता या क्षेत्रांमध्ये महापालिका आणि ल्यूव्हेन शहर यांच्यामध्ये भविष्यातील सहकार्य अधिक मजबूत करण्यासाठी हा दौरा महत्त्वाचा ठरला. महापालिकेचे मुख्य अभियंता प्रमुख संजय कुलकर्णी व सहशहर अभियंता बापूसाहेब गायकवाड, ‘ऑटो क्लस्टर’चे व्यवस्थापकीय संचालक किरण वैद्य, ‘इंडस्ट्री फॅसिलिटेशन सेल’चे प्रतिनिधी विजय वावरे, ‘सीएसआर सेल’च्या प्रतिनिधी श्रुतिका मुंगी यांच्याशी त्यांनी चर्चा केली. ‘सस्टेनेबिलिटी सेल’च्या तांत्रिक सहाय्यक पथकाशीही त्यांनी सखोल चर्चा केली.
पिंपरी चिंचवडमधील औद्योगिक व नवोपक्रम परिसंस्था, ‘अॅक्टिव्ह मोबिलिटी इन्फ्रास्ट्रक्चर’चा विकास, वाहतूक व्यवस्थापनातील प्राधान्यक्रम, शहरी गतिशीलतेसमोरील आव्हाने आणि ‘सस्टेनेबिलिटी सेल’ची भविष्यातील दिशा यावर माहिती सादर करण्यात आली. रोबरेख्त्स यांनी ‘ऑटो क्लस्टर’ला भेट देऊन उद्योजक आणि ‘स्टार्टअप्स’च्या प्रतिनिधींशी संवाद साधला. कौशल्यविकास, नवोपक्रम आणि उद्योजकतेला महापालिका देत असलेल्या प्रोत्साहनाची माहिती त्यांनी घेतली. दुसऱ्या दिवशी त्यांनी ‘अॅक्टिव्ह मोबिलिटी’ आणि नागरी वाहतूक क्षेत्रातील महापालिकेच्या कामांची प्रत्यक्ष पाहणी केली.
-----