सोमाटणे, ता. ९ ः पवनमावळाच्या पूर्व भागात तरस, बिबट्याचा वावर वाढल्याने भाविक, पर्यटक, मॉर्निंग वॉक करणारे आदींमध्ये भितीचे वातावरण निर्माण झाले. त्यामुळे वनविभागाने बिबट्याचा बंदोबस्त करावा, अशी मागणी सुरेश राक्षे, संतोष राक्षे, दिलीप राक्षे यांनी केली आहे.
थंडी वाढल्याने सध्या मॉर्निंग वॉक व घोरावडेश्वर, चौराईदेवी, वाघजाईमाता यांच्या दर्शनासाठी अनेक तरुण पहाटे घराबाहेर पडतात व तासाभराने परतीच्या प्रवासाला निघतात. घोरावडेश्वर व चौराईदेवी डोंगराच्या परिसरात तरसाचा वावर वाढला आहे. शिरगाव, गहुंजे, सांगवडे, दारुंब्रे, साळुंब्रे परिसरात बिबट्याने ठाण मांडले असून जंगली प्राण्यांच्या या वावरामुळे सध्या सर्वत्र भितीचे वातावरण पसरले आहे. वन्य प्राण्यांच्या भीतीमुळे अनेक तरुण, भाविक व पर्यटक यांनी ऊन पडल्यानंतर घराबाहेर पडणे सुरू केले आहे. ऊसतोड कामगारही बिबट्याच्या भीतीने पहाटे शेतात जाणे टाळतात. सकाळी साडेसातनंतर ऊस तोडणीचे कामे सुरू करतात.