सोमाटणे, ता.१३ ः शैक्षणिक क्षेत्रात उल्लेखनीय काम करणाऱ्या शिक्षक कर्मचाऱ्यांना पुणे जिल्हा माध्यमिक शाळा शिक्षकेतर संघाच्या वतीने महात्मा ज्योतिबा फुले यांच्या स्मृती दिनानिमित्त जिल्हास्तरीय आदर्श मुख्याध्यापक व गुणवंत शिक्षक कर्मचारी पुरस्कार दरवर्षी दिला जातो. या वर्षी हे दोन्ही पुरस्कार पवनमावळाने पटकावले.

शिवली येथील छत्रपती शिवाजी विद्यालयाचे मुख्याध्यापक दत्तात्रेय जाधव यांना आदर्श मुख्याध्यापक व आढले येथील कर्मवीर विद्यालयातील शिक्षकेतर कर्मचारी तसेच वासुदेवाच्या भूमिकेतून विद्यार्थ्यांना संस्काराचे धडे देणारे विठ्ठल दळवी यांना गुणवंत शिक्षक कर्मचारी हा पुरस्कार देण्यात आला. पुरस्काराचे वितरण राज्य शिक्षकेतर महामंडळाचे अध्यक्ष शिवाजीराव खांडेकर व माजी आमदार उल्हास पवार यांच्या हस्ते झाले. दळवी यांना यापूर्वी विविध सामाजिक, शैक्षणिक संघटनांच्या वतीने एकतीस पुरस्कार देण्यात आले असून हा त्यांचा बत्तीसावा पुरस्कार आहे. याबद्दल शिवली शाळेच्या वतीने जाधव आणि दळवी यांचा सत्कार करण्यात आला.

NE25V75960