पिंपरी, ता. १४ ः पिंपरी चिंचवड पोलिस आयुक्तालयांतर्गत वाढती गुन्हेगारी रोखण्यासह कायदा व सुव्यवस्था अबाधित ठेवण्याच्या दृष्टीने आणखी एक परिमंडळ निर्माण करण्यात येणार आहे. याशिवाय, हिंजवडी व महाळुंगे एमआयडीसी असे दोन सहायक पोलिस आयुक्त विभाग निर्माण होतील. चाकण, आळंदी व महाळुंगे एमआयडीसी पोलिस ठाण्यांचे विभाजन करून चाकण दक्षिण व उत्तर महाळुंगे या दोन नवीन पोलिस ठाण्यांचीही निर्मिती होईल. त्यासाठी शासनाने रविवारी मंजुरी दिली.
या आयुक्तालयांतर्गत सध्या उपायुक्त परिमंडळ एक, दोन व तीन याप्रमाणे एकूण तीन परिमंडळे, तसेच पिंपरी, चिंचवड, वाकड, देहूरोड, चाकण व एमआयडीसी भोसरी असे सहा सहायक पोलिस आयुक्त विभाग आहेत. त्याअंतर्गत एकूण २४ (२ प्रस्तावित पोलिस ठाण्यांसह) पोलिस ठाणी कार्यान्वित आहेत. सध्याच्या केवळ तीन पोलिस उपायुक्त परिमंडळ व सहा सहायक पोलिस आयुक्त विभाग अशी रचना असल्याने प्रत्येक पोलिस उपायुक्तांकडे प्रत्येकी आठ पोलिस ठाण्यांचे पर्यवेक्षण करण्याची जबाबदारी येत होती. याचा कामकाजावर ताण पडायचा.

पद निर्मितीस मंजुरी
राज्य सरकारने तीन नवीन पोलिस उपायुक्त आणि सहा सहायक पोलिस आयुक्त पदांना मंजुरी दिली आहे. त्यामुळे आता पोलिस उपायुक्तांची एकूण संख्या नऊ होणार असून सहायक पोलिस आयुक्तांची संख्या २१ होणार आहे.

प्रस्तावित ठाण्यांसाठी पदे
दोन प्रस्तावित पोलिस ठाण्यांसाठी निरीक्षक दोन, सहायक निरीक्षक तीन, उपनिरीक्षक सात, सहायक उपनिरीक्षक सहा, हवालदार २२, शिपाई ४२ अशी पदे मंजूर आहेत.

परिमंडळांची अशी असेल रचना
परिमंडळ १ : निगडी, चिंचवड, पिंपरी, संत तुकारामनगर, दापोडी, सांगवी
परिमंडळ २ : हिंजवडी, बावधन, रावेत, वाकड, काळेवाडी,
परिमंडळ ३ :एमआयडीसी भोसरी, भोसरी, दिघी, चाकण उत्तर, चाकण दक्षिण, आळंदी
परिमंडळ ४ : शिरगाव-परंदवडी, देहूरोड, चिखली, तळेगाव दाभाडे, तळेगाव एमआयडीसी, उत्तर महाळुंगे एमआयडीसी, दक्षिण महाळुंगे एमआयडीसी
--------------------