सोमाटणे, ता. १६ ः सांगवडे पूल अर्धवट पाडल्याने पादचाऱ्यांचा मार्ग बंद झाला असून सांगवडेहून मामुर्डीकडे जाणाऱ्या पादचाऱ्यांच्या अडचणी वाढल्या आहेत.
पूल धोकादायक झाल्याने सांगवडे-मामुर्डी पूल दुचाकी, चारचाकी वाहनांच्या वाहतुकीसाठी बंद करण्यात आल्यानंतर पर्यायी व्यवस्था म्हणून अनेक वाहनचालकांनी वाहन प्रवास बंद करून सांगवडे-मामुर्डी प्रवासासाठी या पुलावरून पायी जाणे सुरु केले होते. तर शेतीमाल विक्रेत्यांनी पुलाच्या दोन्ही बाजूला प्रत्येकी एक दुचाकी ठेवून शेतीमालाची वाहतूक सुरू केली होती. दरम्यान नवीन पुलाचे काम वेगात सुरू झाल्याने धोकादायक असलेला पूर्वीचा सांगवडे लोखंडी पूल अर्धवट पाडण्यात आल्याने आता हा रस्ता पादचाऱ्यांसाठीही बंद झाला आहे. पूल पाडण्याआधी पर्यायी व्यवस्था म्हणून पवना नदीत दगडमाती टाकून तातडीने तात्पुरता साकव तयार करणे गरजेचे होते. परंतु, संबंधित ठेकेदारांनी नदीत अर्धवट दगडमाती टाकून अर्ध्या भागापर्यंतच रस्ता केल्याने दोन्ही गावातील दळणवळण सेवा पूर्ण बंद आहे. दोन्ही गावांच्या दळणवळणसाठी संबंधित विभागाने तातडीने नदीतील अपूर्ण असलेल्या तात्पुरत्या रस्त्याचे काम पूर्ण करावे अशी मागणी सरपंच रोहन जगताप यांच्यासह ग्रामस्थांनी केली आहे.