पिंपरी, ता. १६ ः विज्ञान पर्यटनासाठी चालना दिल्याबद्दल ‘विज्ञान सेतू फाउंडेशन –ब्रिजिंग सायन्स अँड सोसायटी’ मुंबई संस्थेद्वारे पिंपरी चिंचवड सायन्स पार्कला ‘विज्ञान सेतू फाउंडेशन पुरस्कार २०२५’ ने गौरविण्यात आले.
परस्परसंवादी विज्ञान दालनांचा विकास, खगोलशास्त्र कार्यक्रम, स्टेम कार्यशाळा, फिरते विज्ञान उपक्रम आणि मोठ्या प्रमाणावरील सामुदायिक संपर्क आदी उपक्रमांची दखल घेवून पुरस्कार प्रदान करण्यात आला. याच श्रेणीमध्ये गुजरात सायन्स अँड टेक्नॉलॉजी (गुजकोस्ट)ला हा पुरस्कार प्रदान करण्यात आला आहे.
पिंपरी चिंचवड सायन्स पार्कचे संस्थापक संचालक प्रवीण तुपे म्हणाले, ‘‘पुरस्कार सर्वसमावेशक व विज्ञान आणि समाज यांच्यात सेतू निर्माण करण्याच्या पिंपरी चिंचवड सायन्स पार्कच्या ध्येयधोरणांशी सुसंगत आहे.’’
पिंपरी चिंचवड सायन्स पार्कच्या मुख्य कार्यकारी अधिकारी डॉ. श्रद्धा खंपरिया म्हणाल्या, ‘‘पिंपरी चिंचवड सायन्स पार्क नावीन्यपूर्ण कार्यक्रमांच्या माध्यमातून सामुदायिक सहभागासाठी व्यासपीठ म्हणून यापुढेही उत्साहाने वाटचाल करीत राहील. पिंपरी चिंचवड सायन्स पार्क विद्यार्थी व जनसामान्यांमध्ये वैज्ञानिक दृष्टिकोन वाढवण्यासाठी व समाजातील सर्व घटकांसाठी विज्ञान सुविधा उपलब्ध करून देण्यास कटिबद्ध आहे.’’