‘अनक्लॉग’ला लोकप्रतिनिधींचाही पाठिंबा
हिंजवडीचा पिंपरी चिंचवड महापालिकेत समावेश व्हावा, यासाठी आयटीयन्सकडून सुरू करण्यात आलेल्या मोहिमेला शहरातील लोकप्रतिनिधींनी पाठिंबा दिला आहे. आमदार महेश लांडे, आमदार शंकर जगताप यांनी आपल्या एक्स हॅंडलद्वारे या मोहिमेला पाठिंबा दर्शविला आहे. हिंजवडी येथील अपुऱ्या पायाभूत सुविधा ही एक गंभीर समस्या असून, या संदर्भात तातडीने उपाययोजना करण्याची आवश्यकता आहे. त्यासाठी हिंजवडीचे पिंपरी चिंचवडमध्ये समावेश करणे गरजेचे असल्याचे त्यांनी म्हटले आहे. दरम्यान, या मोहिमेमध्ये अद्यापपर्यंत जवळपास २० हजार नागरिकांनी आपला सहभाग नोंदवला असून, आठवड्यांच्या शेवटी या सह्यांचे अर्ज घेऊन आपण मुख्यमंत्र्यांपुढे ही मागणी मांडणार असल्याचे याचिकाकर्ता सचिन लोंढे यांनी सांगितले.