पिंपरी, ता. ३ : तरुणावर कोयत्याने प्राणघातक हल्ला करून चार जणांच्या टोळक्याने वाहनांची तोडफोड करीत परिसरात दहशत माजवली. ही घटना दापोडी येथे घडली.
या प्रकरणी मोईउद्दीन ऊर्फ मुन्ना रफिक शेख (रा. एसएमएस कॉलनी, लकी बेकरीजवळ, दापोडी) यांनी दापोडी पोलिस ठाण्यात फिर्याद दिली आहे. त्यानुसार पोलिसांनी साकिब रफिक शेख (वय ३२, रा. लोहगाव, मुळ रा. कासारवाडी), रवी मसलिंगाप्पा लकाबशेट्टी (वय २४, रा. शांतिनगर, विश्रांतवाडी), मोहसीन हनीप शेख (वय २०, रा. येरवडा, पुणे) यांच्यावर गुन्हा दाखल केला आहे. फिर्यादी हे त्यांच्या मित्रांसह बोपोडी पुलाजवळील इनामदार पोल्ट्री फॉर्मसमोरील एका रिक्षात बसले होते. दरम्यान, तेथे आलेल्या आरोपींनी भांडणाच्या कारणावरून फिर्यादी यांना लाथाबुक्क्यांनी मारहाण केली. फिर्यादीला वाचविण्यासाठी आलेल्या लोकांच्या दिशेने कोयता फिरवून ‘मी दापोडीचा डॉन आहे’ अशी धमकी दिली. कोयता हवेत फिरवत दहशत निर्माण केली. त्यानंतर फिर्यादीच्या गळ्यावर वार करण्याचा प्रयत्न केला, मात्र फिर्यादीने तो चुकवला. फिर्यादी यांनी आरोपींच्या हातून स्वतःची सुटका करून घेतली. त्यानंतर आरोपींनी वाहनांच्या काचा फोडून मोटारीतून पसार झाले.