पिंपरी, ता. ७ : ‘‘ईएसआय (कामगार राज्य विमा) रुग्णालयात उपचार घेणाऱ्या रुग्णसंख्येत महिनाभरात २५ टक्क्यांनी वाढ झाली पाहिजे. कामकाजात कुचराई खपवून घेणार नाही. कामचुकार कर्मचाऱ्यांवर त्वरीत कारवाई करा. तर, कुचराई करणाऱ्या कंत्राटी कर्मचाऱ्यांना कामावरुन कमी करावे,’’ असे आदेश महाराष्ट्र राज्य कामगार विमा सोसायटीचे संचालक डॉ. शशी कोळनुरकर यांनी दिले आहेत. त्यामुळे ‘ईएसआय’ वैद्यकीय अधिकाऱ्यांचे धाबे दणाणले आहेत.

आरोग्यमंत्री प्रकाश अबिटकर यांनी राज्यातील ‘ईएसआय’ रुग्णालयातील रुग्णसंख्या, व्यवस्थापन व इतर सुविधांबाबत नाराजी व्यक्त केली आहे. त्यावर राज्य कामगार विमा सोसायटीचे संचालक डॉ. शशी कोळनुरकर यांनी हे आदेश काढले आहेत. राज्यातील सर्व कामगार रुग्णालयांची रुग्णसंख्या, कर्मचारी संख्या, सुविधा, अडचणी आणि खर्च यांचा सविस्तर आढावा त्यांनी घेतला. अधिकाऱ्यांनी प्रत्येक कामगार रुग्णालयास प्रत्यक्ष भेट द्यावी, कामकाजात सुधारणा करावी, रुग्णांना सुविधा द्यावी. मगार रुग्णालय केवळ कामगारांसाठी मर्यादित नसून सर्वसामान्य नागरिकांसाठी खुले आहे, ही माहिती जनतेपर्यंत पोहचवण्यासाठी जागृती मोहीम राबवावी.
यापुढे एका महिन्यात ओपीडी, आयपीडी, शस्त्रक्रिया, प्रसूती दुप्पट झाल्या पाहिजेत. उद्दिष्ट पूर्ण न करणाऱ्या नियमित वैद्यकीय अधिकारी व विशेषज्ञ यांना शिस्तभंगाच्या कारवाईला सामोरे जावे लागेल, असा इशारा देण्यात आला आहे.

रुग्णसंख्या वाढीबरोबरच रुग्णालयातील प्रशासकीय प्रक्रियेत सुसत्रता येण्यासाठी ठोस उपाययोजना केल्या जात आहेत. आरोग्यमंत्र्यांनी बैठकीत विविध सूचना दिल्या आहेत. त्यानुसार कार्यवाही करत आहोत.
- डॉ. वर्षा सुपे, चिकित्सा अधीक्षक, ईएसआय रुग्णालय, मोहननगर