पिंपरी, ता. ८ : रस्ते प्रशस्त मात्र, सिग्नल व्यवस्था नसल्याने तसेच चौकातील आयलंड उभारणीसह इतर कामे अपूर्ण असल्याने बेशिस्त वाहन चालक चुकीच्या पद्धतीने वाहन घुसवत असतात. त्यामुळे निगडी-तळवडे मार्गावरील त्रिवेणीनगर चौकात कोंडी होऊन वाहतूक मंदावत आहे.
निगडीहून तळवडेकडे जाताना वर्तुळ मार्गाच्या ठिकाणी काम अपूर्ण असल्याने मोठे सिमेंटचे पाईप व मातीचे ढिगारे टाकून हा वर्तुळ मार्ग सध्या बंद केला आहे. त्यामुळे या मार्गावरील वाहनांना चिकन चौकाकडे जाऊन वळण घेऊन पुन्हा त्रिवेणीनगर चौकाकडे यावे लागत आहे.

उपाययोजना काय
- सिग्नल यंत्रणा सुरू करणे
- रस्ते दुरुस्तीसह अपूर्ण कामे तातडीने पूर्ण करणे
- वाहतूक पोलिसांची संख्या वाढविणे

वाहतूक कोंडीची कारणे
- सिग्नल यंत्रणेचा अभाव
- बेशिस्त वाहन चालक
- रस्त्यांवरील खड्डे


त्रिवेणीनगर चौकातील रस्ते प्रशस्त झाल्याने प्रवास करताना सोयीचे झाले आहे. मात्र, अद्यापही येथील काही कामे अपूर्ण असून सिग्नल यंत्रणा सुरू नाही. ही कामे तातडीने पूर्ण करणे आवश्यक आहे. त्यानंतर वाहतुकीला चांगली शिस्त लागेल.
- ज्ञानेश्वर बहिरे, वाहन चालक