आळंदी ः रखडलेले रस्ता रुंदीकरण, बेशिस्त वाहनचालक, अवजड वाहने, बेशिस्त बस व रिक्षाचालकांमुळे देहूफाटा चौकात सायंकाळी चार ते रात्री नऊपर्यंत वाहतूक कोंडी नित्याचीच झाली आहे. मरकळ, धानोरे, चाकण, भोसरी, शिक्रापूर औद्योगिक भाग; बांधकाम क्षेत्रामुळे वाहनांची संख्या वाढली आहे. लग्नविधी, देवदर्शन, सार्वजनिक सुट्ट्या, गुरुवार, दशमी, एकादशीला गर्दी असते. अवजड वाहने व अरुंद रस्त्यांमुळे कोंडीत भर पडते. वडगाव रस्ता, प्रदक्षिणा मार्ग, विश्रामगृह ते वाय जंक्शन, एमआयटी महाविद्यालय, मरकळ रस्त्यावरही कोंडी होते.

कोंडीची कारणे...
- काळेवाडी-देहूफाटा-वाय जंक्शन रखडलेले रस्ता रुंदीकरण
- एमआयटी महाविद्यालय परिसरात हातगाड्यांचे अतिक्रमण
- वायजंक्शन परिसरात दुतर्फा चारचाकी वाहने उभी
- बेशिस्त वाहनचालक, चक्राकार मार्ग नसणे, पीएमपी बस रस्त्यावरच उभ्या

उपाययोजना....
- आळंदीत रस्ता रुंदीकरण, देहूफाटा येथे उड्डाणपूल व बाह्यवळण मार्ग गरजेचा
- डुडुळगाव ते केळगाव इंद्रायणी नदीवरील पुलाचे काम जलद करणे
- देहूफाटा ते आळंदी स्मशानभूमी आणि काळेवाडी ते आळंदी खंडोबा मंदिर दरम्यान इंद्रायणीवर पुलांची गरज
- आळंदी शहरात प्रदक्षिणा मार्गावर एकेरी वाहतूक हवी

देहूफाट्यावरून चाकण औद्योगिक भागात जाण्यासाठी जवळचा आणि सुरक्षित मार्ग आहे. सार्वजनिक वाहतूक व्यवस्था पुरेशी नसल्याने दुचाकीने जावे लागते. आळंदीत अनेकदा वाहतूक कोंडी होते. अवजड वाहने व बेशिस्त वाहनचालकांमुळे जीव मुठीत धरून जावे लागते.
- विकास कदम, कामगार, चाकण औद्योगिक भाग