पिंपरी : घरगुती गॅस सिलिंडरमधून इतर सिलिंडरमध्ये बेकायदारित्या गॅस रिफिलिंग केल्याप्रकरणी एकावर गुन्हा दाखल झाला आहे. ही कारवाई पोलिसांच्या गुन्हे शाखेच्या मालमत्ता विरोधी पथकाने महाळुंगे बालेवाडी येथे केली. संतोष मनोहर बंडगर (वय २२, रा. जय मल्हार गॅस सर्व्हिस सेंटर, व्हीटीबी चौक, नांदे रोड, महाळुंगे बालेवाडी) असे गुन्‍हा दाखल झालेल्या व्यक्तीचे नाव आहे. आरोपीने घरगुती वापराच्या गॅस सिलिंडरमधून बेकायदारित्या इतर सिलिंडरमध्ये गॅस रिफिलिंग केला. ज्वालाग्राही पदार्थांबाबत आवश्यक ती खबरदारी न घेता, धोकादायकरीत्या सिलिंडरमध्ये गॅस काढून विक्रीसाठी त्याचा साठा करीत होता.

जुगारप्रकरणी सहा जणांवर गुन्हा
पिंपरी : देहूरोडमधील गांधीनगर परिसरात सुरू असलेल्या जुगार अड्ड्यावर देहूरोड पोलिसांनी छापा टाकला. या कारवाईत सहा जणांवर गुन्हा दाखल करून सहा हजार ७२० रुपयांचा मुद्देमाल जप्त केला. रमजान मोहम्मद हानिफ शेख (वय ५२, रा. ओटास्कीम निगडी), शशिकांत सुभाष मोरे (वय ४३, रा. दत्तनगर, मोहननगर, चिंचवड), अनिल छगन अक्कर (वय ७२), प्रेमदास दौलत चितारे (वय ७२), सूरज बापू साथाळे (वय ३६), लक्ष्मण राम कोथेमगुला (वय ६५, सर्व रा. देहूरोड) अशी गुन्हा दाखल झालेल्यांची नावे आहेत.
---