पिंपरी, ता. ९ : ‘बीआरटी’ मार्गात प्रवेश करणाऱ्या एक हजार ७६२ वाहनचालकांवर मागील सहा महिन्यांत कारवाई करण्यात आली आहे. त्यांच्याकडून १२ लाख ९४ हजार रुपयांचा दंड वसूल करण्यात आला आहे. निगडी वाहतूक पोलिसांनी गेल्या सहा महिन्यांत ही कारवाई केली आहे.
पुणे महानगर परिवहन महामंडळाच्या (पीएमपीएमएल) बससाठी पुणे आणि पिंपरी चिंचवड परिसरात सध्या एकूण आठ ‘बीआरटी’ मार्ग सुरू आहेत. त्यापैकी पाच मार्ग पिंपरी-चिंचवड परिसरात पूर्ण क्षमतेने सुरू आहेत. तर तीन मार्ग पुण्यात सुरू आहेत. पिंपरीत बीआरटी मार्ग व्यवस्थित चालावा म्हणून महापालिका, वाहतूक पोलिस आणि स्थानिक लोकप्रतिनीधींकडून प्रयत्न सुरू आहेत. बीआरटी मार्गात खासगी वाहनांच्या घुसखोरीचे प्रमाण मात्र कायम आहे.
त्यावर निगडी वाहतूक विभागाने पवळे पूल ते खंडोबामाळ चौक, कुदळवाडी सर्कल ते शाहूनगर चौक (स्पाईन रोड चिखली) दरम्यान बीआरटी मार्गात घुसखोरी करणाऱ्या वाहन चालकांवर कारवाई केली आहे. पण, यानंतरही बीआरटी मार्गातील घुसखोरी कायम आहे. त्यामुळे अन्य उपाययोजना करणेही आवश्‍यक झाले आहे.