पिंपरी, ता. १० : महाराष्ट्र औद्योगिक विकास महामंडळ (एमआयडीसी) परिसरातील कामगारांचा प्रवास सुखकर होण्यासाठी वर्तुळाकार बससेवा सुरू केली जाणार आहे. याचा निर्णय पुणे महानगर परिवहन महामंडळाने (पीएमपीएमएल) घेतला आहे. यात प्रामुख्याने चाकण परिसरात या बस धावतील.

पीएमपीएमएलच्या अध्यक्ष तथा व्यवस्थापकीय संचालक दीपा मुधोळ-मुंडे यांनी बुधवारी (ता.९) तळवडे आयटी पार्क, चाकण एमआयडीसी या परिसरांची पाहणी केली. तेथील मार्गांचे तत्काळ सर्वेक्षण हे मार्ग सुरू करण्याच्या सूचना त्यांनी दिल्या.
चाकण आणि भोसरी एमआयडीसी परिसर मोठ्या क्षेत्रावर विस्तारलेला आहे. त्यात सुमारे आठ हजारांहून अधिक प्लॉटधारक असून कंपन्यांना सुटे भाग पुरविणारे पाच हजारांहून अधिक लघुउद्योग आहेत. तसेच महिंद्रा, स्कोडा यासारख्या आंतरराष्ट्रीय कंपन्या आहेत. तेथे लाखो कामगार काम करतात. पण, अपुऱ्या सार्वजनिक वाहतूक सुविधांमुळे स्वतःची वाहने किंवा रिक्षा किंवा ॲपआधारित वाहतूक सेवा देणाऱ्या वाहनांचा आधार घ्यावा लागतो. त्यामुळे रस्त्यावर वाहनांची संख्या वाढून वाहतूक कोंडीसारख्या समस्यांना तोंड द्यावे लागत आहे. त्यावर ही बससेवा विस्तारण्याचा निर्णय घेण्यात आला आहे.

एमआयडीसी परिसरात बस संख्या आणि मार्गांची संख्या खूप कमी आहे. त्यामुळे कामगारांना प्रवास करण्यात अडचणी येत असल्याचे दिसून आले. पीएमपीएमएल अधिकाऱ्यांना नवीन मार्ग आणि बस संख्या वाढविण्याच्या सूचना दिल्या आहेत.
- दीपा मुधोळ-मुंडे, अध्यक्षा, पीएमपीएमएल