पिंपरी, ता. १० : पिंपरी-चिंचवड शहरातील रावेत येथील सर्वे नं. १९४/१ व १९४/२ प्लॉट नं. १९१ ते २०९ तसेच प्लॉट नं. २१० ते २१६ जाधव वस्ती येथे झोपडपट्टी नसताना झोपडपट्टी असल्याचे दाखवण्यात आले आहे. करोडोंचा टीडीआर लाटण्यासाठी खोटी कागदपत्रे तयार करून, सरकारची दिशाभूल करण्यात आल्याचा प्रकार उघडकीस आला आहे.
यासंदर्भात माहिती अधिकार कार्यकर्ते रमेश वाघेरे यांनी मुख्यमंत्री देवेंद्र फडणवीस, उपमुख्यमंत्री अजित पवार, एकनाथ शिंदे तसेच ‘एसआरए’चे मुख्य कार्यकारी अधिकारी नीलेश गटणे, पिंपरी-चिंचवड महापालिका आयुक्त शेखर सिंह यांच्याकडे निवेदनाद्वारे चौकशीची मागणी केली आहे. निवेदनात म्हटले आहे, की जाधव वस्ती येथे स्थानिकांची घरे आहेत. तेथे झोपडपट्टी नाही. पिंपरी-चिंचवड महापालिकेने २००० मध्ये मशाल संस्थेमार्फत केलेल्या शहरातील झोपडपट्ट्यांच्या सर्वेक्षणात या वस्तीचा कोठेही समावेश नाही. तसेच, २०१९ मध्ये महापालिकेच्या कॅनबेरी संस्थेने केलेल्या सर्वेक्षणातदेखील जाधव वस्ती झोपडपट्टी असल्याचा उल्लेख नाही. या वस्तीत सुमारे सात एकर जागेवर ‘एसआरए’ प्रकल्प दाखवण्यात आला आहे.
पिंपरी- चिंचवड नवनगर विकास प्राधिकरणाची स्थापना होण्यापूर्वीपासून जाधव वस्तीत गाववाले जाधव यांची वडिलोपार्जित जागा आहे. त्यावर जाधव कुटुंबीयांची स्वतः ची दोन हजार स्क्वेअर फुटाची घरे आहेत. सर्व्हे नं १९४/१ १९४/२ ही जागा पिंपरी-चिंचवड नवनगर विकास प्राधिकरणाने काही ठिकाणी अधिग्रहीत केली आहे. त्यामध्ये ओपन स्पेस व काही प्रमाणात प्लॉटिंग केले आहे. अधिग्रहणाबाबतचा वाद अद्यापही चालू आहे. तरीसुद्धा येथे एसआरए प्रकल्प दाखवून मिळणाऱ्या टीडीआरमधून सुमारे ५०० ते ६०० कोटी रुपये लाटण्याचा डाव रचला आहे. त्या भागातील रेडीरेकनरचा दर सहा हजार शंभर रुपये असून, एका घरामागे सुमारे चाळीस ते पन्नास लाख रुपये मिळणार आहेत.
स्थानिक रहिवाशांना अंधारात ठेवून तेथे राहत नसलेल्या नागरिकांचे संमती पत्र भरून घेतले. सरकारची दिशाभूल करून एसआरएचा प्रस्ताव दाखल केला. यामध्ये करोडो रुपयांचा आर्थिक गैरव्यवहार करण्याच्या तयारीत असणाऱ्यांवर फसवणुकीचे गुन्हे दाखल करावेत. बोगस एसआरए प्रकल्प रद्द करावा, अशी मागणी निवेदनाद्वारे केली आहे.
‘‘एसआरएकडून नोटिफिकेशन काढण्यात आले आहे. अद्याप जागा ताब्यात घेतलेली नाही. या प्रकरणाची चौकशी अथवा मागणी यासंदर्भात आमच्याकडे पत्र आलेले नाही.
-हिंमत खराडे, सह आयुक्त, जमीन व मालमत्ता विभाग, पीएमआरडीए
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.