पिंपरी, ता. ११ : राज्‍य शासनाच्‍या अन्‍न धान्‍य वितरण व पुरवठा कार्यालयाच्‍या वतीने अंत्योदय योजनेअंतर्गत शिधापत्रिकाधारक महिलांना मोफत साड्यांचे वाटप करण्यात आले आहे. पिंपरी-चिंचवड परिसरातील तीनही शिधापत्रिका कार्यालयांमार्फत ही मोहीम राबवण्यात आली. आत्तापर्यंत तीन हजार ७३१ साड्यांचे वाटप पूर्ण करण्यात आले आहे.
जिल्हा पुरवठा विभागाच्या परिमंडळ कार्यालयाच्या वतीने ही कार्यवाही करण्यात आली. राज्य सरकारच्या वस्त्रोद्योग विभागाच्या योजनेनुसार, दरवर्षी अंत्योदय शिधापत्रिकाधारक कुटुंबातील महिलांना एक साडी मोफत देण्यात येते. ही साडी रास्त धान्य दुकानाच्या माध्यमातून संबंधित महिलांना देण्यात येते. काही वर्षांपूर्वी आनंदाचा शिधा योजनेत ही सुविधा सुरू करण्यात आली होती. मात्र, आनंदाचा शिधा बंद झाल्यानंतरही साड्यांचे वाटप सुरूच राहिले आहे. यंदा पिंपरी-चिंचवडमधील पिंपरी ‘अ’ विभाग आणि चिंचवड ‘ज’ विभागांतर्गत आणि भोसरी कार्यालयांतर्गत साड्यांचे वितरण झाले. पिंपरी विभागात १,५८० साड्यांचे वाटप झाले, तर चिंचवड विभागात २०० साड्यांचे वाटप करण्यात आले आहे. याचबरोबर भोसरी कार्यालयांतर्गत १,९३१ साड्यांचे वाटप झाले, अशी माहिती परिमंडळ अधिकारी यांनी दिली.

दर्जाचा अभाव
पिंपरी, चिंचवड आणि भोसरी तीनही शिधापत्रिका कार्यालयांकडून वाटपाची प्रक्रिया वेळेत पूर्ण करण्यात आली आहे. उपक्रमामुळे गरजू महिलांना थोडा दिलासा मिळाला आहे. मात्र, मिळणाऱ्या साड्यांचा दर्जा चांगला नसल्‍याने शिधापत्रिकाधारकांकडून नाराजी व्‍यक्‍त केली जात आहे.

‘‘शिधापत्रिकाधारकांना साड्यांचे वाटप केले जाते. गतवेळी शासनाकडून प्राप्‍त झालेल्‍या सर्व साड्यांचे वाटप करण्यात आले आहे. आमच्‍या कार्यालयाकडून २०० साड्यांचे वाटप पूर्ण करण्यात आले आहे.
- विजयकुमार क्षीरसागर, परिमंडळ अधिकारी, चिंचवड
---