अश्‍विनी पवार ः सकाळ वृत्तसेवा

पिंपरी, ता. ११ ः पिंपरी चिंचवड शहरात जूनपासून आतापर्यंत १० मलेरिया तर ६ डेंगीचे रुग्ण आढळून आले आहेत. गेल्या वर्षीच्या तुलनेत या वर्षी रुग्णांची संख्या कमी झाली असून, चाचण्यांचे प्रमाणही कमी झाल्याचे महापालिकेकडून मिळालेल्या आकडेवारीत समोर आले आहे. पावसाळा सुरू झाल्यानंतर साचलेल्या पाण्यात एडिस इजिप्ती नावाच्या डासाची पैदास होते. त्यामुळे डेंगीचा प्रसार होतो. यावर्षी मे महिन्यातच जोरदार पाऊस सुरू झाला. या पार्श्‍वभूमीवर गेल्या महिन्यापासूनच महापालिकेने डास प्रतिबंधक मोहीम राबविण्यास सुरवात केली. मात्र, डेंगी, मलेरियाचे रुग्ण व संशयित रुग्णांचे प्रमाण जूनपासून वाढत असल्याचे समोर आले आहे.
महापालिकेकडून मिळालेल्या आकडेवारीनुसार, या वर्षी जूनमध्ये डेंगीचे २ तर मलेरियाचे सहा रुग्ण आढळले आहेत. तर जुलै महिन्यात आतापर्यंत डेंगी व मलेरियाचे प्रत्येकी चार रुग्ण आढळले आहेत. गेल्या वर्षी जुलैअखेर डेंगीच्या रुग्णांची संख्या सतरा तर मलेरियाची सहा होती. त्यामुळे या वर्षी डेंगीचे प्रमाण जरी कमी असले तरी मलेरियाच्या रुग्णांचे प्रमाण मात्र काहीसे वाढल्याचे चित्र दिसत आहे.

आकडे बोलतात....
२०२५

मलेरिया डेंगी
संशयित ः रुग्ण संशयित ः रुग्ण
जून ३२५७१ ६ २०८ २

जुलै ८५३९ ४ १४५ ४
(ता.११ पर्यंत)

२०२४

मलेरिया डेंगी
संशयित ः रुग्ण संशयित ः रुग्ण
जून १८४६६ ः २ ७४१ ः ३

जुलै ८५२६ ः ४ १०५४ ः १४
(ता.१५ पर्यंत)

डेंगीपासून बचावासाठी हे करा...
- पाण्याच्या टाक्या, हौद, पाणी साठविण्याची भांडी झाकून ठेवावीत.
- कुलर, फ्रिज, फुलदाणी यातील पाणी दर दोन-तीन दिवसांनी बदलावे.
- टाकाऊ वस्तू नष्ट कराव्यात.
- सेप्टीक टँकच्या पाइपला जाळी बसवावी.
- आठवड्यातून एकदा पाण्याची भांडी घासून स्वच्छ व कोरडी करावीत
- आठवड्यातून एक दिवस कोरडा दिवस पाळावा.
- डॉक्टरांच्या सल्ल्याशिवाय औषध घेऊ नये.
- डेंगी आजारबाधीत भागात जाणे टाळावे.
- घर व परिसरात पावसाचे पाणी, सांडपाणी साचू देऊ नये.

डेंगीची लक्षणे
- ताप येणे, डोके व डोळे दुखणे
- सांधे व मांसपेशी दुखणे
- ताप येऊन अंगावर लालसर पूरळ येणे
- उलट्या होणे, पोट दुखणे
- थुंकी, उलटी किंवा लघवीतून रक्त पडणे