पिंपरी, ता. १४ : ‘‘रिक्षा चालकांसाठी हायड्रो टेस्टचे वाढलेले दर तातडीने कमी करावेत,’’ अशी मागणी रिक्षा पंचायतीचे पिंपरी-चिंचवडच्‍या पदाधिकाऱ्यांनी केली आहे. जिल्हाधिकारी कार्यालयात झालेल्‍या बैठकीत ही मागणी करण्यात आली.

याबाबत संघटनेचे प्रतिनिधी अशोक मिरगे म्‍हणाले, ‘‘हायड्रो टेस्टचे दर चार पटीने वाढवल्यामुळे अनेक रिक्षाचालक ही चाचणी करून घेत नाहीत. त्यामुळे हे दर पूर्ववत करावेत. सीएनजी पंपावर रिक्षा चालकांवर पोलिसांकडून होत असलेली कारवाई ती थांबवावी.’’

यावर निवासी उपजिल्हाधिकारी ज्योती कदम यांनी वाहतूक पोलिस आणि पंप मालकांना रांगेत योग्य पद्धतीने व्यवस्था ठेवण्याचे निर्देश दिले. तसेच रिक्षाचालकांवर कारवाई न करण्याचेही आवाहन त्यांनी केले. यावर कदम यांनी सांगितले, ‘‘नागपूर येथील कार्यालयातून या बैठकीसाठी कोणी उपस्थित नव्हते. मात्र, रिक्षा पंचायतीचे म्हणणे संबंधितांना कळवून दर कमी करण्यासाठी प्रयत्न केले जातील.’’