पिंपरी, ता. १२ ः भारतीय संस्कृतीत अनन्यसाधारण महत्त्व असलेल्या दिव्य गुरुजनांप्रती आदर, प्रेम व कृतज्ञता व्यक्त करणारा गुरू-शिष्यांच्या पवित्र नात्याचा सन्मान करणारा दिवस म्हणून आषाढी पौर्णिमेला खास स्थान आहे. या वर्षी हा विशेष दिवस गीता आश्रमाने भावपूर्ण वातावरणात साजरा केला. महिंद्रा रॉयल सोसायटीच्या क्लब हाऊसमध्ये झालेल्या कार्यक्रमात सकाळी दहा वाजता सर्व उपस्थितांनी महामंत्राचा जप करून कार्यक्रमाची सुरुवात केली. त्यानंतर गुरुजी पद्मनाभन कृष्णदासा यांचे भाविकांनी उत्साहाने स्वागत केले. त्यानंतर गुरुजींची पाद्यपूजा व सत्कार समारंभ पार पडला. विविध देशांतून व प्रांतातून आलेल्या व लक्षणीय संख्येने उपस्थित असलेल्या शिष्य व भक्तगणांनी नंतर गुरुजींचे दिव्य दर्शन घेऊन गुरू-आरती केली गेली. नंतर गीता आश्रमाच्या अन्नदान सेवेअंतर्गत शिष्यांनी बनवलेल्या महाप्रसादाचा भाविकांनी लाभ घेतला.
उत्सवाच्या दुसऱ्या सत्रात भजन संध्येचे आयोजन करण्यात आले होते. सादर केलेल्या भजनांनी उपस्थित भक्ती-रसात न्हाऊन निघाले. दरम्यान गीता आश्रम’ या संस्थेत गुरुपौर्णिमेचे औचित्य साधून ११ व १२ जुलै दरम्यान दोन दिवसांच्या निःशुल्क योग शिबिराचे आयोजन करण्यात आले आहे. या शिबिराच्या पहिल्या दिवशी अनेकांनी हजेरी लावत योगाभ्यास केला.