पिंपरी, ता. ११ : फार्महाऊसमध्ये वाढदिवसाची पार्टी सुरू असताना एका बांधकाम व्यावसायिकाने त्याच्याकडील पिस्तुलातून दोन वेळा गोळीबार केला. त्यामुळे पार्टीतील नागरिकांच्या जिवाला धोका निर्माण झाला. ही घटना मुळशी तालुक्यातील सुसगाव येथील वृंदावन फार्म हाऊस येथे घडली.
दिनेश बाबूलाल सिंह (वय ४०, रा. स्वर्ग बंगला, थॉमस कॉलनी, मामुर्डी) असे अटक केलेल्या बांधकाम व्यावसायिकाचे नाव आहे. याप्रकरणी देवराम दिनेश वर्मा (रा. वृंदावन फार्म हाऊस, सुसगाव) यांनी बावधन पोलिस ठाण्यात फिर्याद दिली आहे. आरोपी दिनेश हे बांधकाम व्यावसायिक असून, त्यांच्याकडे परवान्याचे पिस्तूल आहे. सुसगाव येथील रावीनगर येथे वृंदावन फार्म हाऊस असून, फिर्यादी वर्मा हे या फार्महाऊसवर केअर टेकर म्हणून काम करतात. दरम्यान, आरोपी दिनेश यांच्या मित्राचा वाढदिवस असल्याने वृंदावन फार्महाऊस येथे पार्टी होती. आरोपी दिनेश हे पार्टीसाठी गेले होते. पार्टीदरम्यान त्यांनी स्वत:कडील पिस्तुलातून दोन वेळा हवेत गोळीबार केला.