सोमाटणे, ता. १५ ः मावळ परिसरात पावसाचा जोर पुन्हा वाढल्याने पाणी नियंत्रित करण्यासाठी कासारसाई धरणातून आज पुन्हा विसर्ग वाढवण्यात आला आहे.
गेले पाच दिवस मावळात पावसाचा जोर कमी झाला होता, त्यामुळे कासारसाई धरणाचा विसर्ग कमी करून तो केवळ १२६ क्युसेक्स प्रमाणे सुरू होता. सोमवारी सायंकाळपासून मावळात पावसाचा जोर आणखी वाढल्याने आढले, पुसाणे, मळवंडी धरणाच्या पाणी साठ्यात वाढ झाल्याने सांडव्यातून वाहणाऱ्या पाण्याचा वेग वाढला आहे. धरणातील विसर्ग वाढल्याने सध्या आढले नदीच्या पुरात आणखी वाढ झाली. संततधार पावसाने कासारसाई धरणाचा पाणीसाठा वाढल्याने पाणी नियंत्रित करण्यासाठी धरणाच्या तीनही दरवाज्यातून विसर्ग वाढवण्यात आल्याने कासारसाई नदीचे पाणी वाढेल, अशी माहिती शाखा अभियंता अमर धायगुडे यांनी दिली.
सध्या धरणातून २४० क्युसेक्स प्रमाणे विसर्ग सुरू आहे. धरणातील पाण्याचा विसर्ग वाढल्याने आढले, कासारसाई नदीच्या पाण्याची पातळी वाढल्याने नागरिकांनी सुरक्षा बाळगावी, नदीपात्रात उतरू नये, जनावरे नदीपात्राजवळ नेऊ नये, असे आवाहन पुणे पाटबंधारे विभागाचे कार्यकारी अभियंता डी. एम. डुबल यांनी केले आहे.
---