पिंपरी, ता. १६ ः थेरगाव-गणराज कॉलनी परिसरात दररोज महापालिकेची कचरा गाडी फिरकत नाही. दोन दिवसांपासून कचरा गाड्या नियमित येत नसल्याने नागरिकांना कचरा साठवून ठेवावा लागत आहे. घरात साठवलेला कचरा ओसंडून वाहू लागतो, त्याची दुर्गंधी सुरू होते, मग वैतागून सायंकाळच्या अंधारात कोणी पाहणार नाही, याची दक्षता घेत कोठेतरी फेकण्यात येत आहे. एकूण परिस्थिती पाहता दररोज कचरा संकलित करण्यात यावा, अशी मागणी स्थानिकांनी केली आहे.
थेरगावमध्ये अनेकदा अंतर्गत रस्ते अरुंद असल्याने किंवा रस्त्यावरच वाहने उभी असल्याने कचरा गाडीला आत येण्यास जागा मिळत नाही, त्यामुळे कचरा गाडी मुख्य रस्त्यावर थांबवावी लागते. परिमाणी नागरिकांना कचरा मुख्य रस्त्यावर आणावा लागतो किंवा कचरा उचलला न गेल्याने दुर्गंधी पसरते. थेरगावमध्ये कचरा उचलणारी गाडी दोन दिवसांपासून न आल्याने परिसरात कचऱ्याचा ढीग जमा झाला आहे. सोमवारी सकाळी आलेल्या गाडीमध्ये आधीच भरलेला कचऱ्याचे उंच ढीग झाला असून, दुर्गंधीमुळे नागरिक त्रस्त झाले आहेत. गाडीत कचरा इतका भरलेला आहे की नवीन कचरा टाकण्यासाठी जागा उरलेली नाही. स्थानिक महिला हातात ओल्या कचऱ्याचा डबा घेऊन गाडीच्या येण्याची वाट पाहत असल्याचे चित्र आहे. कचऱ्याची गाडी पूर्णपणे भरलेली असून अजूनही नागरिक आपला कचरा टाकण्यासाठी गर्दी करत आहेत.

सध्या पावसाळा सुरू असून अशा स्थितीत साठलेला कचरा आरोग्यास हानिकारक ठरू शकतो. महापालिकेच्या घनकचरा व्यवस्थापन विभागाने याकडे गांभीर्याने लक्ष देऊन नियमित सेवा सुरू करावी.
- सरोज चौधरी, रहिवासी

आम्ही दररोज सकाळी कचरा उचलायला येईल, याची वाट पाहतो. पण दोन दिवस झाले, कुणीच आले नाही. कचऱ्यामुळे दुर्गंधी पसरली आहे आणि लहान मुलांचे आरोग्य धोक्यात आहे.
- गुरव म्हणाल्या, रहिवासी

शहरातील स्वच्छता विभागाने याची गंभीर दखल घ्यावी आणि नियमितपणे कचरा उचलण्याची व्यवस्था करावी. गाडी भरलेली असून, दुर्गंधी पसरली आहे आणि त्यामुळे नागरिक त्रस्त झाले आहेत.
- शलाका शिंदे, रहिवासी