पिंपरी, ता. १५ : शेअर बाजारात गुंतवणुकीचे आमिष दाखवून एका तरुणाची सुमारे चार लाख रुपयांची फसवणूक करण्यात आली. हा प्रकार वाकड व सोलापूर येथे घडली. याप्रकरणी श्रीकांत चंद्रशेखर हिरेमेठ (रा. राजे शिवाजीनगर चिखली) यांनी हिंजवडी पोलिस ठाण्‍यात फिर्याद दिली. त्यानुसार पोलिसांनी सौरभ चावला व अजय कुमार आर्या (दोघेही रा. गंगानगर, राजस्थान) यांच्यावर गुन्‍हा दाखल केला. हिरेमेठ यांना ‘सोशल मीडिया’वरील चित्रफितीमुळे चावला आणि आर्या यांच्याबाबत माहिती मिळाली. त्यांची भेट घेतली असता हिरेमेठ यांच्याकडून ४५ हजार रुपये रोख स्‍वरूपात घेण्यात आले. त्यानंतर फिर्यादीच्या खात्यावर पाचशे डॉलर जमा झाल्याचा मेसेज आला. त्‍यानंतर रोज रक्कम वाढत असल्याचे दिसत होते. त्यामुळे हिरेमेठ यांनी एक लाख ९९ हजार रुपये आणि एक लाख ९९ हजार ५०० अशी रक्कम जमा केली. त्यानंतर शेअर बाजाराच्या खात्यात डॉलर जमा झाले नाहीत. याबाबत विचारणा केली असता चावला आणि आर्या यांनी संपर्क बंद केला. फसवणूक झाल्‍याचे लक्षात येताच हिरेमेठ यांनी पोलिसांत तक्रार दिली.
---------------------