पिंपरी, ता. १६ ः ‘स्वरानंद’ संगीत अध्ययन वर्गाच्या वतीने गुरुपौर्णिमेनिमित्त शास्त्रीय गायनाच्या कार्यक्रमाचे आयोजन करण्यात आले होते. चिंचवड गावातील मंगलमूर्ती वाडा येथे पार पडलेल्या या कार्यक्रमात अध्ययन वर्गातील विद्यार्थ्यांनी आपल्या गुरू प्रणाली धामणे यांच्या गायन आणि वादनाच्या माध्यमातून गुरुवंदना दिली. भूप, खमाज, काफी, बागेश्री, भीमपलास, बिहाग, केदार, अल्हेया, बिलावल, भैरव, सारंग, पुरिया धनाश्री या रागांमध्ये ख्याल गायन तसेच वादन सादर केले. विद्यार्थ्यांच्या भक्तिगीताने समारोप झाला. या गायकांना राजेंद्र पुराणिक यांनी तबल्यावर साथसंगत केली. यावेळी अखिल भारतीय गांधर्व महाविद्यालयाच्या परीक्षेत उत्तीर्ण झालेल्या विद्यार्थ्यांना प्रमाणपत्र प्रदान करण्यात आले. यावेळी स्वरानंदची विद्यार्थिनी ऋत्वी मारू हिने सलग १२ भाषांमध्ये गाणे गायले. या गायनाची नोंद ‘इंडिया बुक ऑफ रेकॉर्ड’मध्ये करण्यासाठी प्रयत्न केले जाणार असल्याचे आयोजकांनी सांगितले. याप्रसंगी जयश्री जोशी यांची प्रमुख उपस्थिती होती. मनीषा इंगवले यांनी सूत्रसंचालन केले.
---