पिंपरी, ता. १६ ः आमदार शंकर जगताप यांच्या पुढाकाराने शनिवारी (ता. १९) ‘आमदार आपल्या दारी’ उपक्रम राबवण्यात येत आहे. त्या अंतर्गत वाकड भागातील नागरिकांच्या समस्या विविध शासकीय अधिकाऱ्यांच्या समवेत ऐकल्या जाणार आहेत.
महापालिका प्रभाग २५ व २६ मधील नागरिकांसाठी शनिवारी सकाळी ११ वाजता वाकडमधील हॉटेल बर्ड व्हॅलीमध्ये कार्यक्रम होईल. त्यामध्ये शासकीय योजना आणि मार्गदर्शन, दाखले (रहिवासी, उत्पन्न, जात इत्यादी), शिधापत्रिकेसंबंधित तक्रारी आणि अर्ज, पाणी, वीज, गटारे, आरोग्या संबंधी समस्या व अडचणींचे तत्काळ निवारण केले जाणार आहे. या उपक्रमात महापालिका, महावितरण, पाणीपुरवठा, गटारे, अन्न व नागरी पुरवठा, आरोग्य केंद्र, महात्मा फुले जनआरोग्य योजना, आधार कार्ड, राजस्व विभाग आदी शासकीय यंत्रणांचे अधिकारी प्रत्यक्ष उपस्थित राहतील. त्यामुळे नागरिकांना एकाच ठिकाणी विविध शासकीय कामांसाठी मदत मिळणार आहे. त्यामुळे नागरिकांनी आपल्या तक्रारी आणि अर्जासंदर्भातील सर्व आवश्यक कागदपत्रांची प्रतसोबत आणावी, जेणेकरून त्यांचे प्रश्न लवकर सोडवता येतील, असे आवाहन आमदार जगताप यांनी केले आहे.