पिंपरी, ता. १८ ः महापालिकेच्या प्रारूप विकास आराखड्यातील आरक्षणामुळे रावेत आणि किवळे गावातील अनेक शेतकरी व रहिवाशांवर अन्याय होणार आहे. या आरक्षणाला गावकऱ्यांनी तीव्र विरोध दर्शवला आहे. स्थानिकांशी कोणतीही चर्चा न करता आरक्षण लादल्याचा आक्षेप, सामाजिक कार्यकर्ते दीपक भोंडवे यांनी घेतला आहे. भोंडवे यांनी म्हटले आहे की, सांडपाणी प्रक्रिया केंद्र नदीच्या सान्निध्यात उभारल्यास पर्यावरणाचाही गंभीर प्रश्न निर्माण होणार आहे. गावकऱ्यांनी महापालिकेकडे हरकत दाखल केली आहे. आम्ही उपमुख्यमंत्री अजित पवार, आमदार शंकर जगताप यांची भेट घेऊन आरक्षण रद्द करण्याची मागणी केली आहे. आरक्षण रद्द न झाल्यास आंदोलन उभारण्यात येईल. रावेत आणि किवळेमध्ये टाकलेले दफनभूमी, सांडपाणी प्रक्रिया प्रकल्प किंवा इतर आरक्षणांनी आम्ही विरोध केला आहे.