सोमाटणे, ता. १८ : उर्से परिसरातील काही कंपन्यांमधून बाहेर पडणाऱ्या टाकाऊ प्लॅस्टिक, थर्माकोल व इतर अविघटनशील कचऱ्याची रात्रीच्या वेळी द्रुतगती मार्गालगत होणारी विल्हेवाट आणि त्यानंतर होणारे जाळण्याचे प्रकार दिवसेंदिवस वाढत आहेत. त्यामुळे पुणे-मुंबई द्रुतगती मार्गालगत प्रदूषणाच्या प्रमाणात मोठी वाढ झाली आहे.
गेल्या अनेक वर्षांपासून हा प्रकार सुरू असून, अद्यापही कचरा टाकणाऱ्या आणि जाळणाऱ्या व्यक्तींचा तपास लागत नाही. हा कचरा काही दिवस रस्त्यालगत पडून राहिल्यानंतर पेटवला जातो. यामुळे मोठ्या प्रमाणावर धूर निर्माण होतो, जो एकीकडे रस्त्यालगत पसरतो, तर दुसरीकडे डोंगरांकडे वाहतो.
या धुरामुळे द्रुतगती मार्गावरून प्रवास करणाऱ्या प्रवाशांच्या आरोग्याला धोका होण्याची शक्यता आहे. तसेच डोंगरांकडे जाणाऱ्या धुरामुळे झाडांची पाने, फुले वाळू लागली आहेत. द्रुतगती मार्गालगतच्या चौराई डोंगर परिसरात मोर, भेकर, सांबर, डुक्कर, ससे यांसारखे वन्यप्राणी तसेच सरपटणारे प्राण्यांचे वास्तव्य असून, या धुरामुळे त्यांच्या आरोग्यावरही परिणाम होण्याची भीती व्यक्त होत आहे. तरी कचरा टाकणाऱ्यांवर कारवाई करण्याची मागणी नागरिकांनी केली आहे.
PNE25V32338
---