पिंपरी, ता. १८ ः रोटरी क्लब ऑफ प्राधिकरणाच्या वतीने आयोजित करण्यात आलेल्या ‘सुरमयी शाम’ कार्यक्रमात रसिक मंत्रमुग्ध झाले. चिंचवडमधील प्रा. रामकृष्ण मोरे प्रेक्षागृहात पार पडलेल्या या सांगितिक कार्यक्रमात गायक संदीप उबाळे, धवल चांदवडकर, गायिका सन्मिता धापटे, कोमल कृष्णा यांनी एकापेक्षा एक सरस गाणी सादर करून रसिकांना मंत्रमुग्ध केले.
यावेळी रोटरी क्लबच्या अध्यक्षा दीपा जावडेकर, मावळते अध्यक्ष अजय लंके, दीपा लंके, मावळते सचिव भूषण ढाके, माजी अध्यक्ष विलास गावडे, बालवीर चावला, अदिती जोशी, सुनील कुलकर्णी, रजनी द्विवेदी आदी क्लबचे सभासद उपस्थित होते. या कार्यक्रमाच्या माध्यमातून जमा झालेला निधी ग्रामीण शाळेसाठी खर्च केला जाणार असल्याची माहिती आयोजकांनी दिली.
यावेळी गायकांनी सादर केलेल्या ‘आजा आजा मैं हूं प्यार तेरा’,‘ तुम जो मिल गये हो’, ‘हंगामा हो गया..’, ‘मन क्यू बहका’ अशी गोड गाणी सादर करून उपस्थितांची दाद मिळवली. तर गिटार व सॅक्सोफोन या वाद्यांच्या जुगलबंदीने कार्यक्रमात रंगत आणली. महेश गायकवाड यांनी सूत्रसंचालन केले. दीपा जावडेकर यांनी आभार मानले.
---