पिंपरी, ता. १९ : पुणे महानगर प्रदेश विकास प्राधिकरणाने (पीएमआरडीए) पुणे जिल्हाधिकाऱ्यांच्या सूचनेनुसार रिंगरोड व इतर विकास प्रकल्पांसाठी भूसंपादनाच्या प्रक्रियेला गती दिली आहे. यासंदर्भात झालेल्या बैठकीत भूसंपादनासाठी प्रकल्पग्रस्त शेतकऱ्यांना चार पर्याय देण्यात आले.
आयुक्त डॉ. योगेश म्हसे यांच्या अध्यक्षतेखाली बैठक झाली. वडगाव शिंदे, निरगुडी, आंबेगाव खुर्द, जांभळवाडी, भिलारेवाडी, मांगडेवाडी, गुजर निंबाळकरवाडी, येवलेवाडी, पिसोळी, वडाचीवाडी, कदमवाकवस्ती (ता. हवेली), सोळू (ता. खेड) या गावांतील जमीन रिंगरोडसाठी बाधित होणार आहे. योग्य मोबदला व पर्याय देऊनच प्रकल्प राबवायचे आहेत, असे आश्‍वासन प्रशासनाने शेतकऱ्यांना दिले.
‘पीएमआरडीए’ला सक्तीने भूसंपादन करणेही शक्य आहे. मात्र, सहमतीने प्रश्न मार्गी लावण्यावर भर असल्याचे नुकत्‍याच झालेल्‍या बैठकीत शेतकऱ्यांच्या प्रतिनिधींना स्पष्ट करण्यात आले. दुसऱ्या पर्यायात शेतकऱ्यांनी संमती दिल्यास नियमानुसार ठरलेल्या मोबदल्यापेक्षा २५ टक्के जास्त रक्कम देण्यात येईल. तिसरा पर्याय म्हणजे एफएसआय (फ्लोअर स्पेस इंडेक्स) देऊन मोबदल्याचा समतोल साधणे. चौथा पर्याय म्हणजे टीडीआर (ट्रान्सफरेबल डेव्हलपमेंट राईट्स) देऊन भूसंपादन करणे असा आहे. यापैकी शेतकऱ्यांना अधिक योग्य वाटणाऱ्या पर्यायानुसार पुढील कार्यवाही होईल.
रिंगरोड प्रकल्प पुण्यातील वाहतूक कोंडी दूर करण्यासाठी अत्यंत महत्त्वाचा आहे. त्यामुळे भूसंपादनाची प्रक्रिया गतीने पूर्ण होणार का, याकडे सर्वांचे लक्ष आहे. ‘एफएसआय’ व ‘टीडीआरसार’ख्या पर्यायांची शेतकऱ्यांकडून सविस्तर माहिती मागण्यात आली. पुढील बैठक लवकरच घेऊन त्यावर अंतिम निर्णय जाहीर होईल.
---
मेट्रो मार्गावरील मोबदल्‍याचे वाटप पूर्ण
शिवाजीनगर ते हिंजवडी मेट्रो प्रकल्पासाठी भूसंपादन करण्यात आले होते. त्या वेळी शेतकऱ्यांना नियमानुसार मोबदला देण्यात आला आहे. शंभर टक्के मोबदल्‍याचे वाटप झाल्‍याची माहिती अधिकाऱ्यांनी दिली.
----
रिंगरोडसाठी होणाऱ्या भूसंपादनाबाबत नुकतीच शेतकऱ्यांसमवेत बैठक झाली. शेतकऱ्यांसमोर चार पर्याय ठेवले आहेत. त्‍यामधून निर्णय घेऊन पुढील कार्यवाही होईल. यापूर्वी शिवाजीनगर-हिंजवडी मेट्रोसाठी झालेल्‍या भूसंपादनाच्‍या बदल्‍यात शेतकऱ्यांना शंभर टक्‍के मोबदला वाटप झाला आहे.
- हिंमत खराडे, उपायुक्त, जमीन व मालमत्ता विभाग
-----