पिंपरी, ता. २० ः पिंपरी-चिंचवड महापालिकेच्या पशुवैद्यकीय विभागांतर्गत नेहरूनगर येथील श्वान संतती नियमन शस्त्रक्रिया केंद्रात श्वानांच्या नसबंदी व निर्बीजीकरणासाठी विविध पदांची भरती करण्यात आली.
या भरती प्रक्रियेत १६ जागांसाठी २५ उमेदवारांच्या मुलाखती झाल्या. त्यातील १४ उमेदवार शैक्षणिक अर्हता आणि सेवा कार्यकाळानुसार पात्र ठरले. त्यांना येत्या शुक्रवारपर्यंत (ता. २५) कामावर रुजू होण्याचा आदेश देण्यात आला आहे. त्यानंतर पशुवैद्यकीय विभागामार्फत मोहीम प्रभावीपणे राबविण्यात येणार आहे, अशी माहिती पशुवैद्यकीय विभागाचे उपायुक्त संदीप खोत यांनी दिली.
या केंद्राद्वारे मनपा हद्दीतील श्वानांची संख्या नियंत्रित केली जाते. या भरतीमुळे पशुवैद्यकीय विभागाला अतिरिक्त मनुष्यबळ मिळाले आहे. श्वान संतती नियमन क्षेत्रातील आवश्यक अनुभवी व तज्ज्ञ पशुवैद्यकीय अधिकारी (एबीसी सर्जन), आरोग्य निरीक्षक, पशुधन पर्यवेक्षक व ‘डॉग पिग कुली’ आदी पदांवर थेट मुलाखतीद्वावेर भरती करण्यात आली. यात तीन पशुवैद्यकीय अधिकारी, दोन आरोग्य निरीक्षक, तीन पशुधन पर्यवेक्षक व आठ ‘डॉग पिग कुली’ यांची दरमहा एकत्रित मानधनावर (तात्पुरत्या) स्वरूपात सहा महिन्यांसाठी नेमणूक करण्याची जाहिरात महापालिकेने प्रसिद्ध केली होती.
--------------