पिंपरी, ता. २१ ः सायबर पत्रकारिता करताना तंत्रज्ञानात होत असलेली स्थित्यंतरे अपरिहार्य असून बदलत्या प्रवाहात तंत्रज्ञानाचा विवेक आणि प्रभावी उपयोग केल्यास शाश्वत मूल्यांना धरून पत्रकारिता केली जाऊ शकते, असा आशावाद पिंपरी येथे पार पडलेल्या जिल्हास्तरीय मीडिया संमेलनात उपस्थित वक्त्यांनी व्यक्त केला.
प्रजापिता ब्रह्माकुमारी ईश्वरीय विश्व विद्यालयाचे पिंपरी सेवाकेंद्र आणि माऊंट अबू येथील मीडिया प्रभाग यांच्या वतीने ‘सायबर युगातील पत्रकारिता : मूल्य, आव्हाने आणि संधी’ या विषयावर मीडिया संमेलन आयोजित करण्यात आले होते. या संमेलनाचे उद्‍घाटन ब्रह्माकुमार डॉ. शांतनू, डॉ. सोमनाथ वडनेरे, संजय चांदेकर, सोमनाथ म्हस्के, डॉ. दीपक हरके यांच्या हस्ते दीपप्रज्वलन करून झाले.
प्रास्ताविक करताना ब्रह्माकुमार डॉ. शांतनूभाईजी यांनी सायबर युगातील पत्रकारितेची जबाबदारी वाढल्याचे सांगितले. ब्रह्माकुमारीज् मीडिया प्रभागाच्या वतीने माध्यमक्षेत्रासाठी होत असलेल्या कार्यक्रम आणि उपक्रमांचा त्यांनी यावेळी आढावा घेतला. ‘पत्रकारितेच्या प्रवाहात तंत्रज्ञानाच्या व्यापारीकरणामुळे पत्रकारितेचे सत्य, नि:पक्षता आणि पारदर्शिता हे तत्त्व हरवत चालले असल्याचे डॉ. सोमनाथ वडनेरे यांनी सांगितले. टीआरपीचा पत्रकारांवर पडत असलेल्या दबाव मूल्यनिष्ठ पत्रकारिता करण्यास मुख्य अडसर होत असल्याबद्दल त्यांनी चिंता व्यक्त केली. सोशल मीडियाच्या फेक न्यूज, युजर फिडबँकमधील अफरातफर, क्लिक बेट, सायबर पत्रकारितेतील लुप्त पावत असलेल्या मानवी संवेदना, माध्यम साक्षरता, मीडिया आचारसंहिता बरोबर त्यांनी कृत्रिम बुद्धिमत्ता अर्थात एआयने बनविलेल्या वृत्तपत्रांपर्यंत सायबर पत्रकारितेतील मूल्य, आव्हाने आणि संधी या विषयावर विस्तृत भाष्य केले. प्रभू स्मृतीने कार्यक्रमाची सुरुवात झाली. स्वागत संबोधन ब्रह्माकुमारी सुरेखादीदी यांनी केले. ब्रम्हकुमार अनुप यांनी सूत्रसंचालन केले.
---