पिंपरी, ता. २१ ः पिंपरी-चिंचवड शहर स्वच्छतेमध्ये सफाई कामगारांनी चांगली कामगिरी केल्यामुळे केंद्र सरकारच्या स्वच्छ सर्वेक्षण २०२४ या स्पर्धेत पिंपरी-चिंचवडचा राज्यात प्रथम क्रमांक आला. त्यामुळे कष्टकरी संघर्ष महासंघाच्या वतीने थरमॅक्स चौक येथे महापालिकेच्या सफाई कामगारांचा सत्कार करण्यात आला.
पिंपरी-चिंचवड महापालिकेच्या आरोग्य विभागांतर्गत सफाई कामगार रस्त्याची साफसफाई करतात. घरोघरी जाऊन घटांगाडीद्वारे दैनंदिन कचरा संकलित करतात. स्वच्छतेची जबाबदारी स्वतःच्या खांद्यावर घेणाऱ्या सफाई कामगारांनीच हा किताब पालिकेला मिळवून दिला. याबद्दल कष्टकरी संघर्ष महासंघाचे अध्यक्ष काशिनाथ नखाते यांनी सफाई कामगारांच्या पाठीवर कौतुकाची थाप दिली. सफाई कामगारांचा सत्कार करत पेढे भरवून आनंदोत्सव साजरा केला. सफाई कामगारांना आरोग्य विमा मिळाला पाहिजे, अशी मागणी ही त्यांनी यावेळी केली.