पिंपरी, ता. २५ ः ‘डॉ. शं. ना. नवलगुंदकर हे विद्यार्थिप्रिय शिक्षक होते. शिक्षणातून चांगला नागरिक घडवण्याची त्यांची तळमळ असे. प्रभावी वक्तृत्व असल्यामुळे त्यांनी व्याख्यानाच्या माध्यमातून व्यापक प्रबोधन केले. भारतीय संस्कृती आणि परंपरा यांचे पुनरावलोकन करत नीतिमान पिढी घडवण्याचे काम त्यांनी केले आहे. आपण एका समाजाभिमुख गुरूला मुकलो आहोत,’’ अशा शब्दांत पुणे विद्यापीठाचे माजी प्र. कुलगुरू डॉ. शं. ना. नवलगुंदकर यांना विविध वक्त्यांनी श्रद्धांजली वाहिली.
निगडी येथील स्वातंत्र्यवीर सावरकर मंडळाचे माजी अध्यक्ष असलेल्या कै. डॉ. शं. ना. नवलगुंदकर यांना स्वातंत्र्यवीर सावरकर मंडळ, क्रांतिवीर चापेकर स्मारक समिती, पिंपरी चिंचवड व्याख्यानमाला समन्वय समिती व अन्य संस्थांच्या वतीने श्रद्धांजली सभेचे आयोजन करण्यात आले होते. सभेच्या सुरवातीला प्रदीप पाटील यांनी प्रास्ताविक केले. भास्कर रिकामे यांनी डॉ. नवलगुंदकर यांची कौटुंबिक पार्श्वभूमी सांगितली.
अत्यंत भावपूर्ण वातावरणात झालेल्या श्रद्धांजली सभेमध्ये राजेंद्र घावटे, प्रकाश मिठभाकरे, पद्मश्री गिरीश प्रभुणे, रविकांत कळमकर, श्यामकांत देशमुख, सदाशिव रिकामे, श्रीकांत मापारी, राजाभाऊ गोलांडे, प्रकाश क्षीरसागर यांनी श्रद्धांजली अर्पण करताना डॉ. नवलगुंदकर सरांच्या आठवणी सांगितल्या. डॉ. शं. ना. यांचे ज्येष्ठ पुत्र हेमंत नवलगुंदकर यांनी आपले मनोगत व्यक्त करत कृतज्ञता व्यक्त केली. स्वातंत्र्यवीर सावरकर मंडळाचे तत्कालीन कार्याध्यक्ष व रा. स्व. संघाचे जिल्हा संघचालक विनोद बन्सल यांनी सभेचा समारोप केला.
यावेळी राष्ट्रीय स्वयंसेवक संघाचे विभाग कार्यवाह मुकुंद कुलकर्णी, कर्नल रविकिरण कदम, जयश्री कदम, गीता खंडकर, पांडुरंग फाटक, ज्योती पठाणीया, विश्वास करंदीकर, अनुजा वनपाळ, प्रकाश टाकळकर, रमेश बनगोंडे, राजेंद्र देशपांडे, विकास देशपांडे, राजेंद्र त्र्यंबके, ॲड. सतीश गोरडे, सुहास पोफळे, सुमती कुलकर्णी, राजाभाऊ पोरे, श्यामराव तावडे, एस. आर. शिंदे, वैदेही पटवर्धन, दीपक नलावडे, शैलेश भिडे यांच्यासह विविध विभागांचे पदाधिकारी, कार्यकर्ते उपस्थित होते.